“Mən də hamı kimi məyus oldum. İki görüşün nəticəsinə görə 0:5 uduzduq, amma oyunun detallarına varanda görürsən ki, heç də 0:5-lik oyun deyildi. İlk oyunda çoxlu qol imkanımız var idi, ancaq reallaşdıra bilmədik. Bakıdakı oyuna baxsaq, əslində bunun strategiyasını hamı bilirdi. Bunun üçün böyük mütəxəssis olmaq lazım deyil. Heç kim düşünmürdü ki, “Dinamo” 3:0-lıq qələbədən sonra Bakıda öndə pressinq edəcək və ya açıq futbol nümayiş etdirəcək. 3:0-ı qorumağa çalışacaq, imkan olduqca qol da vuracaqdılar. Oyundan əvvəl demişdim ki, “Qarabağ”ın qol şansları olacağına yüzdəyüz əminəm. Sadəcə, ən təhlükəli məqam əks-hücumlara hazır olmaqdı. Dediyim kimi də oldu. “Qarabağ” yenə bir sıra qol imkanlarından yararlana bilmədi. Əvəzində rəqib əks-hücumları qola çevirdi. Əlbəttə, həmin qollara görə fərdi baxımdan kimlərisə günahlandırmaq mümkündü. Ancaq həmin detallara toxunmaq istəmirəm. Hesab edirəm ki, oyun baxımından geridə deyildik. Hətta “Dinamo”nu üstələyə bildik. Sadəcə, zaqreblilər əlinə düşən imkanlardan yararlanaraq bu dueldən qalib ayrıldı. Yəni bizim çoxlu qol vəziyyəti yaradıb vura bilməməyimiz, rəqibin isə bu qədər az qol imkanından yararlanması onları növbəti mərhələyə daşıdı”.

“Doğrusu, Qurbanovun niyə bu qədər aqressiv olduğunu başa düşə bilmədim. Yəni mən heç vaxt “Qarabağ”ın “Dinamo”ya fiziki baxımdan uduzduğunu iddia etməmişəm. Orda verilən suallar da mənim fikrimi ortaya qoymurdu. Hesab edirəm ki, orda olan bütün media işçilərinin hər birinin düşüncələrini sərbəst söyləmək hüququ var. Ən azı da ona əminəm ki, ordakıların çoxunun futbolu təhlil etmək qabiliyyəti var, fikirlərini də rahat şəkildə səsləndirə bilərlər. Hesab etmirəm ki, mən adamların fikrini dəyişirəm və ya buna təsir edirəm. O ki qaldı şəxsi fikirlərimə, mən heç bir yerdə “Qarabağ”ın fiziki baxımdan rəqibə uduzduğunu iddia etməmişəm. Ortaya qoyduğum düşüncəyə gəlincə, əslində elə baş məşqçinin dediyi sözlərə əsaslanmışam Fikirlərimdən biri də o idi ki, Zaqrebdəki oyunda uduzduq və geri qayıtmaq baxımından son 10-15 dəqiqədə çətinlik çəkdik. Bildirmişdim ki, bilmirəm bu fiziki, yoxsa psixoloji yorğunluq idi. Sona 10-15 dəqiqə qalmış rəqibin 3-4 qol imkanı yaratması faktdı. Dəfələrlə də demişəm ki, bunun fiziki və ya 2-ci qolu buraxandan sonra mental yorğunluq olduğunu bilmirəm. Daha sonra zədəlilərlə bağlı da adım çəkilib. Yankoviçlə Veşoviçin zədəli olduğumu nəzərə alsaq, hesab edirəm ki, yanlış bir şey söyləməmişəm. Bilmirəm, bəlkə də Markolar olsaydı, komanda daha yaxşı oynayardı. Fiziki yorğunluqla bağlı Qurban Qurbanovun özünün dediyi sözlər ondan ibarətdi ki, ağır qrafikdə oynamaq çətindi. Çünki 3 gündən bir oynamalısan, həmçinin heyəti düzgün bölməlisən. Belədə futbolçular əməlli-başlı yüklənirlər. Yəni mən bunun səhv olduğunu, oyunçuların yanlış məşq prosesi üzündən yükləndiyini heç vaxt deməmişəm. Sadəcə, dediyim ondan ibarətdi ki, belə qrafik üzrə çıxış edirsənsə, futbolçular yüklənirlər. Bu fikirlərimin kiminsə yorğun görünməsiylə əlaqəsi yoxdu. Düşünürəm ki, fikirlərimdə haqlıyam. Açıq-aşkar da bu görünür. Sözlərimi başqa cür yozurlar və ya komandanın məğlubiyyətini mənim sözlərimlə əlaqələndirirlər. Ümid edirəm ki, düşüncələrimi izah edə bildim”.