“Qarabağ" ilk 15 dəqiqədə mükəmməl oynadı. Sonradan komandanın oyunundakı fərdi səhvlər məğlubiyyətə gətirib çıxardı. Demirəm ki, “Qarabağ” 11 nəfərlə oynasaydı, qalib gələcəkdi. Amma məğlub olardı, ya yox – bunu bilmək çətindi. "Qarabağ" əvvəlki "Qarabağ" deyil, o əzəməti yoxdu. Ötənilki komanda tam fərqli idi. "Braqa" və "Bayer-04” ilə oynayan heyət qorundu, amma futbolçuların yanaşması dəyişdi. Zubir bu il sönük oynayır, Benzya əvvəlki Benzya deyil. Romao həm çempionatda, həm də Avropada müntəzəm ciddi səhvlər edir, Medina da eləcə. "Qarabağ"da eniş var. Zubirin, Medinanın, Benzyanın yerinə normal oyunçu gətirilməlidi. Komandaya yeni nəfəs lazımdı.

Qurban Qurbanovun ünvanına “istefa” qışqırmağın nə qədər yanlış hərəkət olduğunu düşünmürlər. İllərdi Çempionlar Liqasının, Avropa Liqasının, Konfrans Liqasının qrupuna düşürlər. Yaxşı olanda Qurbanova heykəl qoymaq istəyənlər indi istefaya səsləyir. İndiki məqamda futbol ictimaiyyəti, fanat ordusu Qurban Qurbanova və komandasına dəstək olmalıdı. Ağır vəziyyətdə dəstək yoxdusa, deməli, sevgi yoxdu. Azərbaycan futbolunun uğurunu istəyirik ki, illərdi bunun öhdəsindən tək "Qarabağ" gəlir”.