Misli premyer-liqasının 32-ci turunda “Sumqayıt” “Qarabağ”ı məğlub edib - 1:0.

“Football-plus.az” xəbər verir ki, matçdan sonra “gənclik şəhəri” təmsilçisinin məşqçisi Mübariz Orucovun mətbuat konfransı keçirilib. Sizi onun fikirləri ilə tanış edirik:

- Ehtiyatda daha təcrübəli qolkiper Orxan Sadıqlı olsa da, Xəyal Fərzullayevi meydana buraxdınız. Riskli addım deyildi?
- Xəyal haqda danışmaq istəyirdim. Debüt etdi, özü də "Qarabağ" kimi rəqiblə oyuna çıxmışdı. Oyundan sonra alnından öpdüm. Bəli, Orxan Sadıqlı da var idi. Amma qapıçı məşqçisi və Samir Abasovla da məsləhətləşdik ki, Xəyala şans verək. Özünü də doğrultdu. Xəyalı təbrik edirəm, debütünü möhtəşəm qələbə ilə qeyd etdi.

- "Qarabağ"la oyuna hazırlıq müddətində baş məşqçiniz Samir Abasov İspaniyada səfərdə idi. Komandanı oyuna kökləməkdə Abasov sizə dəstək oldu?
- Gündə bir neçə dəfə Samir Abasovla əlaqə saxlayırdıq. O, bizə tapşırıqlarını verirdi. Düzdür, komandanı oyuna mən çıxarmışdım, amma bu Samir Abasovun komandasıdır, onun əziyyətidir. Həftəboyu danışmışıq, məsləhətləşmişik. İspaniyada olsa da, sanki bütün günü bizimlə idi.

- "Qarabağ" üzərində qələbə komandaya qarşıdakı oyunlarda əlavə motivasiya verəcək?
- Əlbəttə ki, motivasiya verəcək. Futbolçular dərk edir ki, bundan sonra hər oyun finala bərabərdi. Bu gün həmin matça final ab-havasında çıxmışdıq. Geriyə yox yoxdu. Hər oyunun mahiyyəti eynidi.

- "Sumqayıt"ı avrokuboklarda düşünürsüz? Futbolçuları buna inandıra bilmisiz?
- Bu gün Avropanın ən güclü komandalarından birinə qarşı oynadıq. Futbolçulara oyundan qabaq dedim ki, avrokuboklarda oynamaq istəyiriksə, "Qarabağ" elə ən yaxşı rəqibdir. Bu dəqiqə onlar "böyük beşlik" komandalarından geri qalmır. "Qarabağ"la oynamağı bacarırıqsa, demək ki, avrokuboklarda da yaxşı çıxış edə bilərik. Bunu futbolçular dərk edirlər.