“Sabah”ın “Zirə” ilə səfər qarşılaşmasının gedişində məcburi əvəzetmə oldu.

Lepinitsa zədə üzündən mübarizəni davam etdirə bilmədiyindən Şakir Seyidov mübarizəyə qoşuldu. “Sabah”ın yarımmüdafiəçisi oyundan sonra “Futbol+”in suallarını cavabladı.

- “Zirə” hesabı bərabərləşdirə bilməsəydi, indi 4-cü yerdə siz olacaqdız. Nəticədən nə dərəcədə razı qaldın?
- Oyunun çətin keçəcəyini bilirdik. Bura 3 xal üçün gəlmişdik. Təəssüf ki, 1 xal qazana bildik. Meydanda gərgin mübarizə gedirdi. Təbii, rəqib də bizim kimi qələbə istəyirdi. Çətin, həm də maraqlı oyun keçdi. Bu oyunu unudub növbəti tura hazırlaşağıq.

- Həqiqətən bərabər səviyyəli oyun getdi, yoxsa son anda sizin şansınız gətirmədi?
- Sona qədər üstün futbol oynadıq. Təəssüf ki, ani diqqətsizlikdən qol buraxdıq. Onların vurduğu qol oyunun taleyini həll etdi. Bir neçə epizodu qaçırdıq, buna görə şansımız gətirmədi. Bizim yaratdığımız fürsətlər daha çox idi.

- "Zirə"yə qarşı oyunlarınız sanki fərqli ab-havada keçir. Bu nə ilə bağlıdı?
- Hər iki komanda meydana mübarizə üçün çıxır. "Zirə" ilə oyunlarımız həmişə sona qədər mübarizə xarakterində keçir. Bu oyun da elə oldu. Hər iki komanda Avropa təcrübəsinə malikdi. Ona görə rəqabət də sona qədər yüksək tempdə davam edir.

- İlk dövrədə evdə “qartallar”a məğlub olmuşduz. Bu dəfə 1 xalla getmək sizi nə dərəcədə qane etdi?
- İkinci hissədə qol vəziyyətini dəyərləndirə bilsəydik, məncə, belə nəticə olmazdı. Fikrimcə, oyunun qırılma nöqtəsi həmin məqam idi. O epizodu dəyərləndirirə bilsəydik, heç 1:1-ə qədər uzanmayacaqdı. Qismət belə oldu. İstəməzdik ki, 2 xal itirək, amma görünür, ədalətli nəticə bu imiş.

- Bu il avrokuboka yollanmaq niyyətində olan komandalar daha çoxdu. "Sabah" üçün bu, qorxu yaradırmı?
- Azərbaycan çempionatı həmişə ağır keçir. Amma rəqiblər necə güclənirsə, biz də “artırmağa” çalışırıq. Məşqlərdə daha da güclənirik. İnanıram ki, gələcəkdə daha maraqlı oyunlar izləyəcəksiz.

- Növbəti tur “Neftçi”nin qonağı olacaqsız. Oyundan gözləntiniz?
- Biz hər oyuna qələbə üçün çıxırıq. Çünki itirdiyimiz 1 xal belə sonda əleyhiimizə işləyə bilər. Ona görə də “Neftçi” ilə oyuna da 3 xal üçün çıxacağıq.

RÖYANƏ OĞUZ