Bilindiyi kimi, futbol üzrə ölkə çempionatının 1-ci liqasında çempionluğa iddialı əsas iddialılar “Qəbələ”, “İmişli” və “Karvan”dı.

Yevlax təmsilçisi ev oyunlarını minlərlə azarkeşin dəstəyi altında keçirir. “İmişli” isə şəhər stadionunda görülən təmir işləri üzündən təmsil etdiyi bölgədən didərgin düşüb.

Bəs “Qəbələ”? Bu yazıda “komanda 1-ci liqaya düşsə belə, dəstəyimizi əsirgəməyəcik”, “komandanı nə evdə, nə də səfərdə tək qoyan deyilik” deyən qəbələli azarkeşlərin, xüsusilə “Red Black Army”nin vədinə nə dərəcədə sadiq qalıb-qalmadığına nəzər salacağıq.

Belə ki, “Qəbələ” indiyə qədər üç ev oyunu keçirib. Sizi həmin oyunlardakı azarkeş sayıyla tanış edirik:

1-ci tur: Zaqatala (0:0) – 500
3-cü tur: Mingəçevir (2:0) – 180
5-ci tur: Difai (1:0) – 200

Göründüyü kimi, komandanın ev oyunlarını indiyə qədər 880 azarkeş izləyib. Bu da hər oyunda orta hesabla 293 nəfər deməkdi. O başqa məsələ ki, komanda premyer-liqada iştirak etdiyi 2023/24 mövsümündə də təxminən belə statistika ilə yadda qalıb.

Maraq üçün qeyd edək ki, “Karvan” 2024/25 “futbol ili”ndə keçirdiyi üç ev oyununda 6200 azarkeş toplayıb. Deməli, hər ev matçını orta hesabla 2066 tamaşaçı izləyib. İndi sevimli (?) komandasını həm elitada, həm də 1-ci liqada yetərincə dəstəkləməyən qəbələli azarkeşlər günahkardı, ya yox?

KƏNAN BAHADIR