İslandiya – Türkiyə oyunu təxirə salınmaq üzrə imiş
Millətlər Liqası çərçivəsində keçirilən İslandiya – Türkiyə oyunundan öncə diqqətçəkən xəbərlər gəldi.
Uzun müddət oyunun keçirilməsi şübhə altında idi. Belə ki, Reykyavikdəki “Lauqardalsvyollur” stadionunun ot örtüyü buz bağlamışdı. Hətta bu üzdən Türkiyə yığması dünənki məşqi üstüörtülü meydanda keçirməli olmuşdu. 15 min azarkeş tutumuna malik olan stadionda isitmə sistemi yoxdu. Onu görə də əvvəlcə ot örtüyünün üzərinin bağlanmasına qərar verildi. Türkiyə Futbol Federasiyasının başqan vəkili hətta türkiyəli həmkarlarımıza açıqlamasında oyunun təxirə salınması ehtimalının yüksək olduğunu vurğuladı:
“Ot örtüyü buz bağlamış vəziyyətdədi. Oyunun təxirə salınmaq ehtimalı 51 faizdi. Vəziyyəti dəyərləndirmək üçün toplantı keçirildi. Oyunun sabaha keçirilmə ehtimalı mövcuddu. Türkiyə vaxtı ilə saat 17.00-da hakim yenidən meydana çıxaraq ot örtüyünün durumunu incələyəcək. Daha sonra oyunla bağlı qərar veriləcək”.
Amma Reykyavikdə günortadan sonra hava açıldı və gün çıxdı. Kazancının da qeyd etdiyi kimi Türkiyə vaxtı ilə 17.00-da (bizim vaxtla 18.00-da) UEFA nümayəndələri və hakimlər briqadası meydana çıxaraq durumu dəyərləndirdilər. Onlar həm havanın, həm də ot örtüyünün matçın keçirilməsi üçün əlverişli olduğuna qərar verdilər. Bu üzdən oyunun çərşənbə axşamına təxirə salınmasına ehtiyac qalmadı.
Qarşılaşma əvvəlcədən planlaşdırıldığı kimi, Bakı vaxtı ilə saat 22.45-də başladı.
Digər xəbərlər
