“Həmişə olduğu kimi, “Qarabağ”la matçda da komandamızı tək qoymayacağıq. Gəncə ilə Tovuz arasındakı məsafə az olduğundan başqa azarkeşlər də stadiona yollanacaq. Komandamıza inanırıq. Futbolçular istənilən rəqibə qarşı bütün gücüylə, böyük motivasiyayla çıxış etməlidi. Təbii ki, hər tərəfdar komandasının qələbə qazanmasını istəyər. Futbolçularımıza inanırıq. Kollektivdə müsbətə doğru ciddi irəliləyiş var. Birinci dövrə mövsümlərarası fasilədə görülən seleksiya işinin pis olduğunu göstərdi. Amma “Neftçi”ylə oyun bizi ümidləndirdi. Baş məşqçi Azər Bağırov da heyətdə dəyişikliklər edib. Həmin qələbənin təsadüfi olmadığını düşünürəm. Qış fasiləsinə qədər xal ehtiyatımızı artırmalıyıq. Onsuz da iki mövsümdü premyer-liqada qalmaq uğrunda mübarizə aparırıq. “Kəpəz”in özünü toparlayacağına, çempionatı bir-iki komandadan yuxarı pillədə başa vuracağına inanırıq. Ən pis halda, 1-ci liqaya düşəcəyik. Fanklub olaraq, bunu qəbul etmək çətin olsa da, aşağı liqada da komandamızın yanında olacağıq”.