“Hələ çempionatın başlanğıcındayıq. Növbəti oyunlara köklənəcəyik. Dünənki matça gəlincə, ilk dəqiqədə qol buraxmağımız xoş olmadı. Halbuki rəqibi yaxşı təhlil etmişdik. “Karvan” oyununu Bəhruz Teymurovla Peter Kinqsin üzərində qurur. Futbolçulara bununla bağlı tapşırıq verilmişdi. Təəssüf ki, ani diqqətsizlikdən hesabda geri düşdük. Ümumiyyətlə, müdafiə xəttinin və qapıçının səhvləri bizə baha başa gəldi. İkinci hissənin əvvəlində Elmir Rəhimzadəni meydana buraxdıq. O, özünü yaxşı tərəfdən göstərib hesabı bərabərləşdirdi. Lakin Xəlil Bəşirov, Murad Qayalı, Elməddin Sultanov və Mehdi Tahirov kimi aparıcı futbolçuların zədəli olması rahat rotasiyalar etməyə imkan vermədi. Belədə komandam yoruldu və “Karvan”ın dəyişiklikləri effekt verdi. Növbəti qolları vurdular. Əslində, hesabı 2:1 etdikdən sonra xeyli qol vəziyyəti yaratdıq. Fərqi artırmaq imkanı var idi. Təəssüf ki, bunlardan yararlana bilmədik”.

“Karvan” üçüncü qolu vurandan sonra futbolçusu Emil Qasımov texniki zonamıza, azarkeşlərimizə “sus” işarəsi göstərdi. Ardınca aləm bir-birinə dəydi. Təsəvvür edin ki, yevlaxlı azarkeşlər tribunadan gəlib bizim texniki zonanı yumruqlayırdılar. Qısası, rəqib bizi təxribata çəkirdi. Sonra meydana butulkalar atdı. Futbolçum İdris İnqilablı qırmızı vərəqə aldı. Baş hakim Rəvan Həmzəzadə deyir ki, İdris meydançaya atılan butulkanı azarkeşlərin üzərinə atıb. Amma İdris belə davranış sərgiləmədiyini bildirdi. Ümumiyyətlə, 1-ci liqada meydan sahibi komandalara tərəfkeşlik var. Gözümün qabağında “Karvan”ın futbolçusu baş hakimə, ifadəmə görə üzr istəyirəm, “korsan?” işarəsi etdi. Bu, dünyanın hər yerində sarı vərəqədi. Amma həmin futbolçu cəzasız qaldı. Hakimlərin nəsə maraqları varsa, bu başqa məsələ. Yenə də nəticəyə təsir edən qərar verdiklərini düşünmürəm. Sadəcə, xırda səhvlər ümumi işə təsirsiz ötüşmür. Biz məğlubiyyətə yox, qələbəyə layiq idik”.

“Karvan”ın stadionunda matçdan sonra yuyunmağa su yoxdu. Komanda bu çatışmazlığa görə hər dəfə AFFA İntizam Komitəsi tərəfindən cərimələnir. Amma su problemini aradan qaldırmır. Vallah, belə hallar çox gülməlidi”.

“İcazənizlə əvvəlcə haşiyə çıxım. Ona görə ki, Peşəkar Futbol Liqası peşəkarlıqdan kənar fəaliyyət göstərir. Biz hələ “Qəbələ”ylə matçın dəqiq tarixini bilmirik. Rəsmi saytda təqvim 23-25 oktyabr qeyd olunub. Futbolda hər saat önəmlidi. Neçə gün istirahət etməliyik? Matça hazırlaşmaq üçün nə qədər vaxtımız var? Həftəlik proqramımızı necə tərtib edək? Bilinmir. Futbolçular da insandı. Yüklənmələr az və ya çox olanda fəsadları olur. Konkret təqvim bilinməlidi ki, ona görə hərəkət edək. Həqiqətən çox qeyri-peşəkar yanaşma var. Mən UEFA-da çalışıram. Bilirəm ki, məsələn, İngiltərədə nəinki həftəlik, aylıq planlar əvvəlcədən, heç olmasa, günlərə əsasən elan olunur. Digər tərəfdən, 1-ci liqada oyunlar niyə həftəsonu olmur? Bu, ilk növbədə azarkeş marağı baxımından vacib məsələdi. “Qəbələ”ylə oyuna gəlincə, komandanı həm fiziki, həm də psixoloji baxımdan hazırlayıb qələbə məqsədilə meydana buraxacağıq. Başqa seçimimiz ola bilməz!”