Dünən 1-ci liqanın 8-ci turunda "Karvan" "İmişli" ilə üz-üzə gəldi.

"Football-plus.az" xəbər verir ki, qarşılaşmada qalib müəyyənləşmədi - 1:1.
Oyundan sonra "ağ-qaralar"ın baş məşqçisi Kənan Kərimov suallarımızı cavablandırdı...

- Maraqlı keçən mübarizədə qalib müəyyənləşmədi. Oyun haqda nə deyə bilərsiz?

- Matçın əvvəlcədən gərgin keçəcəyini bilirdik. Turnir cədvəlindəki mövqeyimizi yaxşılaşdırmaq istəyirdik. "İmişli" də çempionluq uğrunda mübarizə aparan komandadı. Bu oyuna 3 xal qazanmaq üçün çıxmışdıq. Hesabda da öndə idik. Uşaqlar heç də pis təsir bağışlamadı. Adi diqqətsizlikdən qapımızdan qol buraxdıq. Mübarizə davam edir. Hələ çempionluq üçün şansımız var. Turnir cədvəlində maraqlı vəziyyət yaranıb. Liderlə aramızdakı xal fərqi 4-ə bərabərdi. Növbəti oyunlara köklənəcəyik. Növbəti oyunlarda meydana qələbə üçün çıxacağıq. Hədəfimiz üst sıralarda qərarlaşmaqdı.

- Stadionun ot örtüyünün durumu o qədər də yaxşı deyildi. Bu məqam həm oyuna, həm də nəticəyə nə qədər təsir etdi?

- Bizim komanda düz meydançada daha yaxşı oyun sərgiləyir. Ot örtüyünün belə olması təbii ki, oyunumuza təsir edir. Stadionunun durumu yaxşı olsaydı, daga ürəkaçan oyun nümayiş etdirərdik.

- Ot örtüyünün dəyişdirilməsi ilə bağlı rəhbərliklə danışıqlarınız olub?

- Mövsümün əvvəlində sradiona əl gəzdirildi. Meydançaya toxum səpildi. Sadəcə, vaxt azlığı imkan vermədi ki, işi tam yekunlaşdıraq. Havaların da normal keçməməsi, yağışların həddindən artıq çox yağması imkan vermədi ki, toxum yaxşı inkişaf etsin. Arenanı qorumaq üçün məşqlərimizi bazada keçiririk.

- "Karvan" bu mövsüm iddialı komandadı. Amma ilk turdan sonra doğma meydanda qələbə qazana bilməyib...

- Bu mövsüm 1-ci liqada maraqlı mübarizəyə şahidlik edirik. Hər komanda çempionluq uğrunda oynayır. Biz də gözləmədiyimiz halda doğma meydanda iki oyunda məğlub olduq. Yenə deyirəm, lider komandadan o qədər də geridə deyilik. Çempionluq yarışından qopmamışıq. Mübarizəmizi davam etdiririk. Çalışacağıq ki, çempion olaq.


İLKİN SULTANLI