XXI əsrdə ən çətin dönəmlərindən birini yaşayan ''Mançester Yunayted''də ser Aleks Ferqyuson ilə bağlı yeni qərar qəbul edilib.

Rəhbərlik klubun xərclərini azaltmaq istəyir və bu proses əfsanəvi şotlandiyalı mütəxəssisdən də yan ötməyib. Bilindiyi kimi Ferqyuson baş məşqçi fəaliyyətini başa vurduqdan sonra, elə həmin ildən, yəni 2013-dən bu yana ''Yunayted''in səfiri vəzifəsini icra edirdi. Bu iş qarşılığında o, illik təxminən 2 milyon funt sterlinq qazanırdı. Amma İngiltərə mətbuatının iddiasına görə Ferqyuson bu işdən azad edilib və ona artıq heç bir məbləğ ödənilməyəcək.

İşbirliyinin bitməsini Ferqyusona birbaşa Cim Retkliff özü onunla təkbətək görüşdə xəbər verib. ''Yunayted''in hissədarlarından, eləcə də INEOS şirkətinin qurucusu olan Retkliffin ser Alekslə görüşünün dost ab-havada bitdiyi xəbər verilir. 82 yaşlı mütəxəssis rəhbərliyin bu addımını anlayışla qarşılayıb. Amma Ferqyuson klubun qeyri-rəsmi direktoru vəzifəsini icra etməkdə və oyunları stadiondan izləməkdə davam edəcək.

Xatırladaq ki, 1986-2013-cü illərdə ''Yunayted''i çalışdırmış Ferqyuson klubun başında 38 titul qazanıb.

ƏLİ