“Qəbələ”nin baş məşqçisi Kaxaber Sxadadze klubun rəsmi saytına müsahibə verib.

"Football-plus.az" xəbər verir ki, gürcüstanlı mütəxəssis komandanın çıxışı və qarşıdakı məqsədlər barədə fikirlərini bildirib.

- “Qəbələ”nin bu mövsümdə keçirdiyi 4 oyunu necə qiymətləndirirsiniz? Komandadan istədiklərinizi ala bilirsiniz?
- Komandamın indiyə qədər göstərdiyi oyundan razıyam. Məncə, nəticələrimizin də yaxşı olduğunu demək olar. Futbolçularım çox diqqətlidilər və verdiyimiz bütün tapşırıqları hərtəfərli yerinə yetirirlər. Onların məşqlərdə əziyyət çəkməsi, işləməsi məni tam qane edir.

- Müsahibələrinizdə digər komandaların hər birinin “Qəbələ”yə qarşı xüsusi motivasiya ilə oynadığını bildirmisiniz. Sizcə, bu “Qəbələ”nin əleyhinədi yoxsa lehinə?
- Əlbəttə ki, “Qəbələ”yə qarşı bütün klubların motivasiyası böyükdü. Çünki, komanda daha öncə premyer-liqada mübarizə aparıb və böyük uğurlara imza atıb. Hər kəs “Qəbələ”yə qarşı daha yaxşı görünmək istəyir. Biz bütün rəqiblərimizə hörmətlə yanaşırıq və yanaşmalıyıq. Bu, oyunçularımızın daha da diqqətli olmalarına səbəb olur.

- 1-ci liqada mübarizə aparan klubların bir çoxu ot örtüyü problemi yaşayır. Bu cür meydançalarda oynamaq komandanın çıxışına necə təsir edir?
- Bəli, mən dəfələrlə qeyd etmişəm ki, meydançaların vəziyyəti ürəkaçan deyil. Belə olduğu halda isə, yaxşı oynamaq, gözəl futbol göstərmək çətin olur. Bu yalnız “Qəbələ”yə deyil, bütün klublara çətinlik yaradan səbəbdi. Bu cür ot örtüklərində heç bir komanda istədiyi oyunu nümayiş etdirə bilmir.

- Komandanın cari mövsümdə əsas hədəfi, heç şübhəsiz, çempionluqdu. Çoxları “Qəbələ”nin asanlıqla bunun öhdəsindən gələcəyini düşünür...
- Çempionat çox çətin və ağırdı. Heç kim deyə bilməz ki, bu liqada çempion olmaq asan əldə edilə biləcək nəticədi. Fərqli komandalar, fərqli oyunlar var. İlk gündən mən bildirmişdim ki, çempionat çətin keçəcək. Bu baxımdan nə baş verəcəyi ilə bağlı proqnoz vermək çətindi. Lakin əlimizdən gələni edirik ki, bu il 1-ci liqanı çempion kimi başa vuraq.

- Çempionatın növbəti turunda keçiriləcək “Difai” ilə oyuna hazırlıq necə gedir?
- Çempionatın ötən turunda keçirdiyimiz “Baku Sportinq”lə oyundan sonra komandanı bir neçə günlük istirahətə buraxdıq. Daha sonra yenidən bir araya gələrək məşqlərimizə start verdik. Oyunçularımız da sevərək, yorulmadan çalışırlar, məşq edirlər ki, istədiyimiz nəticəni əldə edə bilək. Məşqçilər heyəti olaraq, komandamızın hazırlığından da razıyıq. Sadəcə bir problem sayılacaq nüans odu ki, 3 futbolçumuz U-21 millisinin heyətindədi. Onlar isə yalnız matça 2 gün qalmış komandaya qoşulacaqlar. Digər bütün proseslər isə istədiyimiz kimi gedir.

- Son turda səfərdə “Baku Sportinq”i 2 cavabsız qolla məğlub etdiniz. Rəqibin meydançası isə məlum olduğu kimi, olduqca pis vəziyyətdə idi. Artıq kubok oyununun da püşkü atılıb. “Qəbələ” 2-ci təsnifat mərhələsində öz meydanında məhz “Baku Sportinq”lə qarşılaşacaq. Kubok oyunu ilə bağlı fikirləriniz maraqlıdı...
- Kubok oyunlarımız hələ start götürməyib. Ona qədər isə bizim hələ vacib çempionat oyunlarımız var. Ayın 19-u “Difai” ilə qarşılaşırıq. Ona görə hazırda məhz bu matça köklənmişik. Yalnız növbəti oyunumuz hansıdısa, ona hazırlaşırıq. Bir neçə oyun sonranı indidən düşünmək, hələ tez olar. Bu səbəbdən hazırkı durumda yalnız növbəti matça ciddi şəkildə hazırlaşmaqdan başqa fikrimizi heç nəyə yönəltmirik.