Xəbər verdiyimiz kimi, “Qəbələ” iyulun 25-də növbəti mövsümə hazırlığa başlayacaq.

Komandanın baş məşqçisi Kaxaber Sxadadze ilə əlaqə saxlayaraq bəzi suallara cavab almaq istədik.

- Bir neçə gündən sonra təlim-məşq toplanışlarına başlayacaqsız.

- Ayın 25-dən toplanacağıq. Təlim-məşq toplanışı ilə bərabər çempionata hazırlaşmağa başlayacağıq. Hazırlıq üçün vaxtımız çoxdu. 40 gün komandanı hazırlaşdırmaq üçün yetərincə uzun zamandı.

- Heyətdəki futbolçuların əksəri ayrıldı. Bəs onların əvəzizə yeni oyunçular varmı?

- Yeni transferlər üzərində ciddi çalışmalar gedir. Bu haqda daha ətraflı danışa bilməyəcəm. Amma yaxın günlərdə yeni transferlər olacaq.

- Klubun büdcəsi transfer işinizə nə dərəcədə mane olur? Lazımi transferlər həyata keçiriləcəkmi?

- Bu suala cavab vermək istəmirəm.

- Kaxaber Sxadadze istədiyi komandanı qura biləcəkmi?

- Əsas problemimiz də odu ki, komanda elita ilə vidalaşdığına görə bir çox futbolçu sıralarımızı tərk etdi. Bu üzdən klub seleksiya, heyətin gücləndirilməsi məsələsi üzərində çox çalışır. Güclü heyət formalaşdırmağa çalışırıq.

- Növbəti mövsümdə çempionluq üçün oynayan komandalar çox olacaq. Rəqibləriniz artıq hazırlaşarkən gecikdiyinizi və sizə çətin olacağını düşünürsünüz?

- Hamıya məlumdu ki, “Qəbələ” ilk növbədə elitaya qayıtmağa can atır. Mənim və komandanın qarşısına məhz bu məqsəd qoyulub. Təbii ki, asan olmayacaq, bütün rəqiblər bizə qarşı xüsusi hazırlaşacaq. Amma hədəfə çatmaq və “Qəbələ”ni premyer-liqaya qaytarmaq üçün bu çətinliklərin öhdəsindən gəlməyə məcburuq. Bu komandada qalmağımın əsas məqsədi də premyer-liqaya çıxmaqdı. Daha sonra qarşımıza yeni hədəflər qoyacağıq.

RÖYANƏ OĞUZ