"Neftçi"nin yeni baş məşqçisinin kimliyi ilə bağlı informasiya vakkumu yaranıb. Təbii ki, bunda klubun atılan addımlarla bağlı konkret məlumatları mətbuata çatdırmamasının, eləcə də iddialarla bağlı sorğulara aydınlıq gətirməkdən boyun qaçırmasının rolu böyükdü.

Həmçinin indiyə qədər bu vəzifə ətrafında azı 10 mütəxəssisin adı hallanıb. Bunlardan biri də bosniyalı məşqçi Sergey Yakiroviçdi. Hətta onun klubla danışıqlar aparmaq məqsədilə Bakıda olduğu bildirilir.

"Football-plus.az" mütəxəssisin vətəninin mətbuatına istinadla xəbər verir ki, yayılan bilgilər həqiqəti əks etdirmir. Daha dəqiqi, Yakiroviç nə "Neftçi" ilə danışıq aparır, nə də bu məqsədlə Bakıya ayaq basıb. Çalışdırıcı "ağ-qaralar"dan təklif də almayıb. Amma bosniyalı həmkarlarımız "Neftçi"nin Yakiroviçlə danışıqlara başlayacağını istisna etmir.

KƏNAN BAHADIR