UEFA bu yay Almaniyanın evsahibliyi ilə keçirilən və İspaniyanın zəfəri ilə başa çatan Avropa çempionatının yekunlarına dair bir sıra maraqlı məqamları dərc edib. Dərhal qeyd etmək yerinə düşər ki, budəfəki AÇ-də turnirin tarixinin azarkeş rekordu yeniləndi!

AÇ-yə ən çox futbolçu göndərən çempionat premyer-liqa oldu. Belə ki, İngiltərə çempionatından ümumilikdə 114 futbolçu turnirdə iştirak etdi. Bu göstəricidə A seriyası 104 futbolçu ilə 2-ci, bundesliqa 81 futbolçu ilə 3-cü, La Liqa 56 futbolçu ilə 4-cü və Liqa-1 31 futbolçu ilə 5-ci pillədə yer aldı.

“Böyük beşliy”in ardınca Türkiyə çempionatı qərarlaşıb. Superliqadan AÇ-yə 25 futbolçu yollandı. 35 fərqli ölkədən ümumilikdə 218 klub turnirə oyunçu göndərdi. Bu göstəricidə isə lider italyanlardı. İtaliyanın 28 klubunun oyunçuları turnirdə iştirak etdi. İngiltərədən 27, Almaniyadan 21 klubun futbolçuları AÇ-yə yollandı.

Elə bu göstəricidə də “böyük beşliy”in ardından Türkiyə qərarlaşıb. Superliqadan ümumilikdə 10 klubun üzvü qitə turnirinin həyəcanını yaşadı. 7-ci pillədə isə 8 klubla Səudiyyə Ərəbistanının qərarlaşması diqqəti çəkir.

AÇ-nin iştirakçıları arasında ən çox futbolçusu öz ölkəsində çıxış edən komanda İngiltərə oldu. “Üç şir”in heyətində yer alan 26 futbolçudan 24-ü premyer-liqanı təmsil etdi. Sonrakı pillələrdə İtaliya (23) və Almaniya (20) qərarlaşdı.

Türkiyə yığması bu göstəricidə 7-ci pillədə yer aldı. “Ay-ulduzlular”da 26 futbolçudan 12-si Türkiyədə, 14-ü isə xarici ölkələrdə çıxış edirdi. Turnirdə yalnız iki komanda – Albaniya və Danimarkanın bütün üzvləri xarici ölkələrin çempionatlarını təmsil etdilər. Klublar arasında AÇ-yə ən çox futbolçu göndərənlər “Mançester Siti” ilə “İnter” oldu. İngiltərə və İtaliya çempionu turnirdə hərəyə 13 futbolçu ilə təmsil olundu. Onları “Real” və PSJ (hərəyə 12) təqib etdi.

Türkiyə klubları arasında AÇ-yə ən çox (7) oyunçu göndərən “Fənərbaxça” bu siyahıda 20-ci pillədə yer aldı. Almaniyadakı turniri stadionlardan ümumilikdə 2,7 milyon futbolsevər izlədi ki, bu da yuxarıda qeyd etdiyimiz kimi, rekord göstərici oldu.

Əvvəlki rekord Fransada keçirilən AÇ-2016-da (2,4 milyon) qeydə alınmışdı. Bu məqam təqvimlə bağlı bütün çətinliklərə rəğmən, nəhəng turnirlərin hələ də sevildiyini göstərir. Fanatların toplaşdığı fan zonaları isə turnirin gedişində ümumilikdə 6,2 milyon adam ziyarət etdi.