“Qriqorçukun "Qəbələ"də hansı uğuru olub? Bura gələndə deyirdilər ki, komandaya kömək edəcək, mən deyirdim yox. Uğur titul deməkdi, başqa meyar yoxdu. O vaxt "Qəbələ"nin büdcəsi “Qarabağ"dan yüksək idi, amma kuboku belə qazana bilməmişdi. Ona görə uğurlu məşqçi deyil. Deyirlər ki, Avropa Liqasının qrupuna düşmək uğurdu, futbol camiəsinin 99 faizi hələ 2005-ci ildə yaşayır. Bir klubun ki büdcəsi 30 milyon dollardı, qrupa düşmək onun borcudu. Sadəcə, o vaxt "Xəzər Lənkəran", "Bakı", başqa bərbad idarəçiliyi olan klublar var idi ki, qat-qat artıq büdcəsi ola-ola, bunu bacarmırdılar. Bu baxımdan qrupa düşmək o vaxtı uğurlu görünüb. Ancaq Cəbəllütariq, Kosovo klubları hər il qrupdadı. Bizdə uğur meyarları düz vurğulanmayıb. Əsas odu ki, məşqçi müasir futbolla ayaqlaşsın. Qriqorçukun təyinatı tam fiasko idi, onu bura gətirmək kökündən yanlış addım idi. 10 il əvvəl uğuru olub deyə seçim etməməlisən. 10 il ərzində futbol da, məşqçi də dəyişir. Avropada çox məşqçi var ki, hansısa uğuru qazanıb dayanır və CV-də yazılır ki, illər əvvəl hardasa nəsə edib. Azərbaycan futbolu çox özəl bir yerdi. Rusiyada, Avropada nəticə verən məşqçi üçün belə zəmanət yoxdu ki, onu burda təkrarlaya biləcək. Hər halda, “Neftçi”də son 4 mütəxəssis əcnəbi olub və bunlarla da nəticə əldə olunmayıbsa, yəqin bir neçə yerli məşqçiyə şans vermək olar. Bizdə bir neçə baş məşqçi var ki, hazırda bu yükün altına girə bilərlər. Yerli mütəxəssislərə münasibətdə bir qədər inamsızlıq var. Məşqçiyə şans verməlisən ki, görək o işi bacaracaq, ya yox. Məncə, bu yükü qaldıra biləcək yerli məşqçilər var. Çünki əcnəbi gələcək, yenə köhnə nağıllar başlayacaq: "heyəti mən yığmamışam, yanvarda 10 nəfər çıxaraq, 10 nəfər gətirək" və s. Hazırda işləyən məşqçilərdən Elmar Baxşıyev, Ayxan Abbasov sübut ediblər ki, istənilən şəraitdə, fərqli-fərqli vəziyyətlərdə nəticə verə bilirlər. Ən əsası komanda qurmağı, oyun üslubu ilə seçilən kollektiv formalaşdırmağı bacarırlar. İşləməyən məşqçilərdən isə Aftandil Hacıyev ola bilər. Tərlan Əhmədov və Samir Abasov əvvəl “Neftçi”də çalışıb, hansısa amillərə görə işini davam etdirə bilməyiblər. Deməli, hansısa, nəsə nöqsanları olub ki, orda qalmayıblar. "Neftçi" ağır klubdu. Burda məşqçi həm də psixoloq olmalıdı ki, bu da kommunikasiya baxımından çox vacibdi. Samir Abasov kimi "Neftçi" azarkeşlərinə qarşı danışan biri heç ağlından keçirməməlidi ki, kluba qayıdıram. Hər halda, keçmiş unudulmur. Fikrimcə, klub keçmişə yox, sabaha baxsın”.