''Qalatasaray''ın göz bəbəyi Mauro İkardinin bu mövsümkü performansı və hərəkətləri müzakirə mövzusu olmaqda davam edir.

Argentinalı forvard Türkiyə karyerasında mövsümün ən zəif startını reallaşdırıb. O cari mövsüm 10 rəsmi oyunda yalnız 3 qol vura bilib. Çox zəif təsir bağışladığı ''Alanyaspor''a qarşı son matçın ardından İkardi əvvəlcə komanda yoldaşları ilə birlikdə qələbəni qeyd etmədi. Fanatların önünə çıxmayan təcrübəli futbolçu dərhal paltardəyişmə otağına yollandı. Daha sonra isə o futbolçulara verilən 4 günlük istirahəti fürsət bilərək özəl təyyarə ilə İstanbuldan vətəni Argentinaya yollandı. .

İkardinin məhsuldarlığının azalması fonunda tez-tez vətəninə yollanması da camiədə birmənalı qarşılanmır. Futbolçu isə haqqında səsləndirilən tənqidlərə ''instaqram''ın hekayə bölümündəki paylaşımla cavab verib. O indiyə qədər ''Qalatasaray''dakı göstəricilərinin və qazandığı titulların yer aldığı bir şəkil paylaşıb.

Qeyd edək ki, İkardi ''Cim-Bom''da 83 rəsmi oyunda 58 qol, 22 məhsuldar ötürməlik performans sərgiləyib və 2 çempionluq, 1 superkubok olmaqla 3 titul qazanıb. O hazırda klub tarixinin ən məhsuldar oyunçuları siyahısında 3-cü pillədədi. Bu arada ''Sabah'' nəşri İkardinin bitmək bilməyən səyahətləri ilə bağlı ortaya maraqlı iddia atıb. 31 yaşlı futbolçu sentyabrın əvvəlindən bu yana artıq 3-cü dəfə səyahətə yollanıb.

Nəşrin iddiasına görə, İkardinin müqaviləsində bununla bağlı xüsusi maddə var. Belə ki, onun mövsüm ərzində 8 dəfə özəl təyyarədən istifadə etmək hüququ var. Bu, kluba mövsümlük 500 min dollara başa gəlir. Bundan başqa İkardinin illik rəsmi maaşı 6 milyon avro göstərilsə də, ulduz futbolçu sponsorlar və başqan Dursun Özbəkin köməyi ilə əlavə 4 milyon avro da qazanır. Yəni onun illik qazancı ən azı 10 milyon avrodu.

''Qalatasaray'' Viktor Osimhendə də bu cür taktikadan istifadə edib. Nigeriyalının rəsmi sənəddə maaşı 6 milyon avro göstərilsə də, əslində qazancı 11 milyon avrodu. Və nəhayət, İkardinin evinin kirayə pulunu və uşaqlarının təhsil haqqını da klub ödəyir. Onun 4 gün tamam olan kimi İstanbula qayıdaraq məşqlərə başlayacağı gözlənilir.

ƏLİ