"Kimliyindən asılı olmayaraq..." - Kənan Kərimov zirvəni əldən vermək istəmir
"Karvan" 1-ci liqada yeni mövsümə çempion ədasıyla başlayıb. Yevlax təmsilçisi ilk 4 turda qələbə qazanmaqla turnir cədvəlinə başçılıq edir.
Kollektivin 1-ci liqanın ən güclüsü olduğunu düşünənlər var ki, çoxu premyer-liqaya vəsiqə qazana biləcəklərini iddia edir. Amma "Karvan" hələ çempionatın digər iddialıları - "Qəbələ" və "İmişli" ilə qarşılaşmayıb. Bəlkə uğurun sirri məhz bundadı?
Yevlaxlıların baş məşqçisi Kənan Kərimov qeyd olunanlarla bağlı fikirlərini "Football-plus.az"a açıqladı:
"Qazanılan nəticələrə görə futbolçularıma təbrik düşür. Bütün oyunlarda layiqli qələbə qazanıblar. Yenə də yeni "futbol ili"nin əvvəlidi. İndidən çempionluq haqda danışmaq olmaz. Bunun üçün çox tezdi. Biz kimliyindən asılı olmayaraq, bütün rəqiblərimizə eyni düşüncə tərziylə yanaşırıq, aralarında fərq qoymuruq. Meydana yalnız qələbə qazanmaq üçün çıxırıq. Bu, qarşıda bizi gözləyən bütün oyunlarda belə olacaq. Məqsədimiz zirvəni tərk etməməkdi. Birinci pilləni qorumağa çalışacağıq. Növbəti məsələlərə isə yalnız mövsümün sonunda aydınlıq gələcək".
KƏNAN BAHADIR
Digər xəbərlər
