Təqvim oktyabrın 3-nü göstərir, hər kəs günün başa çatmasını gözləyir. Axı “Qarabağ”ın çətin Avropa sınağı var. Azarkeşlər semestrin son imtahanına hazırlaşan tələbələr kimi səbirsizlənir, 3 oyunluq qolsuz məğlubiyyət seriyasının, nəhayət, başa çatacağına inanırdı…

Minlərlə adamın arasında “Bəhramov”a yaxınlaşıram. Oyunun başlamasına hələ 1 saat var. Payız mehinin coşdurduğu futbol havasında stadionun qapısından daxil olanda gördüm ki, azarkeşlər, xüsusən də azyaşlılar tələm-tələsik tribunalara axışır. “Fanşop”un önündən yolunu salanlar Juninyonun, Toralın və başqalarının formasını, klub rəmzlərini alıb stadiona tələsirlər.

Sözün düzü, Çempionlar Liqasının ötənaykı oyunlarında olan böyük coşqunu, anşlaqı görə bilmədim. Media tribunasına çatanda gördüm ki, qonaq komandanın azarkeşləri də yerini alıb, İsveç bayrağını və klub rəmzlərini sərgiləyirlər. Bu arada gözüm boş tribunalara sataşdı. Stadionun diktoru Sənan Şəfizadə 27 min azarkeşin gəldiyini desə də (protokolda hətta 28234 yazılıb...), bu saydan söhbət gedə bilməzdi. “İmarət Tayfa” adəti üzrə stadionun yuxarı başında yer alıb, “Qarabağ Ordu” fanklubu isə onunla üzbəüz. Hər ikisi bir tribunanı tam doldurmuşdu. “Malmö” özü ilə 10-a yaxın jurnalist və 66 azarkeş gətirmişdi.

“Qarabağ”ı dəstəkləməyə gələn məşhurlar da çox idi. Matç başlamamış “Qarabağ” mobil tətbiqində 1000 nəfərdən çox adamın iştirak etdiiyi müsabiqənin qaliblərini açıqladı. Yəni ən çox bəyənilən, həm də “Qarabağ”a aid olan 30 fotoşəkil böyük ekranda təqdim olundu.

Azarkeşlər meydanda yaşananlara emosional reaksiya verir, müxtəlif şüarlar səsləndirirdi. Qurban Qurbanov daha gərgin görünür və çox vaxt tapşırıqları Abbas Hüseynova verir, o da komanda yoldaşlarına çatdırırdı. Stadiondakılar Juninyonun sayılmayan qolundan sonra hakimi kütləvi şəkildə tənqid və təhqir etdilər. Zubirin 84-cü dəqiqədə dirəyə dəyən zərbəsindən sonra azarkeşlərin bir hissəsi gərgin şəkildə stadionun çıxışına üz tutdu.

Hakim final fitini səsləndirəndən sonra Juninyo ilə Lasse Yonsen formasını dəyişdi. Məyus “köhlən atlar” azarkeşləri alqışlayaraq meydanı tərk etdi. “Qarabağ”ın futbolçularını daşıyan avtobus “Bəhramov”dan çıxanda 10-a yaxın azarkeş onları dəstək şüarları ilə müşayiət etdi. “İmarət” səninlədi, başını dik tut, biz sənə inanırıq “Qarabağ” sədalarının təsiri altında mən də stadiondan uzaqlaşdım...

RÖYANƏ OĞUZ