Üç aydan çox idi ölkə futbolu avrokubok oyununa həsrət qalmışdı.

Son dəfə ötən il noyabrın 3-də Bakıda “Frayburq”u qəbul edən “Qarabağ” srağagün axşam saatlarında “Gent”i sınağa çəkdi. Havanın küləkli, şaxtalı, yağışlı olmasına rəğmən, azarkeşlər oyunun başlamasına 2 saat qalmış “Tofiq Bəhramov”a axışırdı. Polislər həm azarkeşləri, həm də media nümayəndələrini ciddi yoxlamadan sonra içəri buraxırdı.

Stadionda Türkiyə - Azərbaycan qardaşlığı ilə bağlı mahnılar səslənir, hər iki ölkənin bayraqları dalğalanırdı. Komandalar da Türkiyə və Suriyada baş verən zəlzələ nəticəsində həlak olanların xatirəsini anmaq üçün meydana qara sarğıda və üzərində həm türkcə, həm də ərəbcə “Yanınızdayıq” sözü yazılan plakatla çıxmışdı. Oyun birdəqiqəlik sükutdan sonra başladı. Daha doğrusu, burda da ciddi qeyri-dəqiqliyə yer verildi. Qayda belədi ki, futbolçular bir-biri ilə görüşəndən, püşk atılandan, komandaların meydandakı yeri bəlli olandan sonra futbolçular mərkəz çevrəsi boyunca düzülür və sükut elanını gözləyir. Ancaq stadionun diktoru Ramiz Qafarov həmin prosedurları gözləmədən birdəqiqəlik sükut élan etdi. Ardından dediyimiz prosedurlar gerçəkləşdi və azarkeşlər 2-ci dəfə ayağa qalxdı.

Vaxtilə AZAL və “Turan”da çıxış edən, hazırda futbol, reklam blogerliyi ilə məşğul olan Nuqzar Kvirtiya həm oyundan əvvəl, həm də oyunun gedişində çəkilişləri, dəstəyi ilə diqqəti cəlb edirdi. Stadiona həmişəkindən az media təmsilçisi gəlmişdi. Görünür, hava şəraiti azarkeşlərlə yanaşı, həmkarlarımıza da təsir etmişdi. Elə belçikalı azarkeşlərin sayı da gözləniləndən az idi. Cəmi 20-25 qonaq azarkeş 29-cu sektorda yerini almışdı ki, səslərini çıxaran kimi bizimkilər onları susdururdular.

Oyunun gedişində zəif təsir bağışlayan Ramil Şeydayev dəfələrlə, xüsusən də penaltini boşa verəndən sonra azarkeşlərin səbrini daşırdı. Onlar “Diakabi”, “Benzya” şüarlarıyla yeni futbolçuları meydana səsləməyə başladı. Tribunalarda, əsasən də mərkəzi sayılan, biletin qiymətinin baha olduğu sektorlarda boş yer çox olsa da, dəstək baxımından problem yaşanmadı. Bunda isə “Qarabağ”a könül verən fanklublar böyük rol ynadı. Onlar səsləndirdikləri şüarlarla tribunaları da ayağa qaldırırdı. Yeni tablo da azarkeşlərin ürəyincə idi.

Oyun Azərbaycan standartları ilə yanaşanda gec başa çatacağından – isveçli hakim 2-ci hissəyə 8 dəqiqə artırmaqla buna özünməxsus töhfə verdi - Bakı metropoliteni iş vaxtını 1 saat uzatmışdı. Amma hər iki komandanın baş məşqçisi mətbuat konfransına gec gəldi. Bu üzdən də media mənsublarının əksəriyyəti metroya vaxtında çata bilmədi. Mən stadiondan ayrılanda artıq saat 2-yə işləyirdi. Maraq üçün onu da qeyd edim ki, Belçikadan Bakıya iki həmkarımız da gəlmişdi.

ABDULLA İSMAYILOĞLU