“Üçüncü dəyişiklikdə bilmədik ki, kimi əvəzləyək” – Kurban Berdıyev
Misli premyer-liqasının 9-cu turunda "Turan Tovuz” evdə "Zirə"ni 1:0 hesabıyla məğlub etdi.
“Football-plus.az” xəbər verir ki, oyunsonrası mətbuat konfransında “Turan Tovuz”un baş məşqçisi Kurban Berdıyev jurnalistlərin suallarını cavablayıb:
- "Zirə"nin Azərbaycan çempionatında aparıcı klublardan biri olması, ölkəni avrokuboklarda da təmsil etməsi heç kəsə sirr deyil. Biz onsuz da təxmin etmişdik ki, oyun çox çətin olacaq. İlk yarıda "Zirə"nin üstünlüyü və qol epizodları olsa belə, onların qarşısını aldıqları üçün uşaqlara təşəkkür edirəm. Üstəlik rəqibə qol vurmaq imkanı vermədikləri üçün də təşəkkürümü bildirirəm. İkinci hissədə artıq planlı dəyişikliklər etdik. Əvvəlcə oyunu bərabərləşdirdik, daha sonra müəyyən epizodlarda da onları üstələdik. Uşaqlara qələbəyə görə təşəkkür edirəm. Əvəzetmələr oyunu gücləndirdi.
- İkinci hissədə hücumda təzyiqi artırdız. Əvvəlcədən planlaşdırılmışdı?
- Bəli, dəyişikliklər planlı şəkildə edildi. Üçüncü dəyişiklikdə isə bilmədik ki, kimi əvəzləyək. Amma ilk ikisi planlı idi.
- Legioner limitinin olması əl-qolunuzu nə dərəcədə bağlayır?
- Xüsusi problem yaratmır. Aleks Souza uzun müddət idi zədələnmişdi, oynaya bilmirdi. Fərid var, o da meydana çıxanda yaxşı mübarizə aparır.
- Birinci dövrə başa çatdı. Nəticəni qənaətbəxş sayırsız?
- Qazanılan nəticələrə görə daxili rahatlığımız var, bizi sevindirir. Bu oyun və ondan əvvəlki oyunlar da göstərdi ki, üzərində işləməli olduğumuz məqamlar var.
ƏSƏD SEYİDOV
