"Turan Tovuz" Misli premyer-liqasının 6-cı turunda "Sabah"ın meydanında 1 xal qazandı - 2:2.

"Football-plus.az" xəbər verir ki, "bozqurd"un baş məşqçisi Kurban Berdıyev matçdan sonra jurnalistlərin suallarını cavablayıb.

- Paltardəyişmə otağında uşaqlara dedim ki, sadəcə birinci və ikinci hissənin ilk dəqiqələrində uduzduq. Komandamdan çox razıyam.

- Qələbə qolu üçün nə çatmadı?
- 2-ci hissədə bəzi futbolçular bəzi mövqelərdə boşluq verdiyindən qol buraxdıq. Birinci qolu isə həyacanla əlaqələndirirəm. Əlbəttə, "Sabah"ın əziyyətini də heçə saymamalıyıq.

- Üçüncü qolun sayılmaması haqda nə düşünürsüz? Deyilənə görə, top xəttən çıxıb.
- Qərar yan xətt hakiminindi. Elə deyirsə, bu barədə nəsə demək mümkün deyil. Videodan həmin epizod görsənmirdi.

- Nəhayət, qol buraxmamaq seriyanız qırıldı. Kapitan Şəhriyar Əliyevin yoxluğu matça necə təsir etdi?
- Futbolçular "Şako"nun yoxluğunu hiss etdirməməyə çalışdı.

- 5 ballıq şkala üzrə komandanızı necə qiymətləndirirsiz?
- Konkret rəqəm deyə bilmərəm. Razı qaldığım və qalmadığım məsələlər var.

- Azarkeşlərin çempionluq tələbi var. Bu, kollektivin üzərində əlavə təzyiq yaratmırki?
- Tərəfdarlarımıza təşəkkür edirik. Biz hər oyuna qələbə üçün çıxırıq. Yekun nəticənin necə olacağını yalnız Allah bilir. Komanda şəklində mübarizə aparmağa davam etsək, sürpriz qeydə alına bilər.

- "Turan Tovuz"un futbolçuları ötən mövsüm tez-tez hakim qərarlarına etiraz edirdi. İndi belə hallar demək olar ki, qeydə alınmır. Kurban Berdıyev kollektivin bu xüsusiyyətini necə dəyişdi?
- Çalışırıq ki, oyunçular hər mənada nizam-intizamı qorusun. Prosesi müəyyən hissələrə bölmək olmaz. İntizam bütöv anlayışdı.

- Mətbuatda yayılan məlumatlara görə, komandaya pleymeyker və hücumçu axtarırsız. Doğru bilgidi?
- Əslində, bu, Otto Conla bağlıydı. Ona təklif gəldiyi üçün yeni hücumçu axtarırdıq. Pleymeyker iaə istənilən kollektivə lazımdı.

KƏNAN BAHADIR