"Turan Tovuz" Misli premyer-liqasının 2-ci turunda evdə "Sumqayıt"a qalib gəldi - 1:0.

"Football-plus.az" xəbər verir ki, "bozqurd"un baş məşqçisi Kurban Berdıyev matçdan sonra keçirilən mətbuat konfransında jurnalistlərin suallarını cavablandırıb.

- Oyun iki fərqli hissədən ibarət oldu. Birinci yarıda kifayət qədər fəal çıxış etdik. Qol epizodlarından istədiyimiz dərəcədə yararlana bilməsək də, zövq aldım. Futbolçularım ikinci hissədə hesabı qorumağa üstünlük verdi. Rəqibə gəlincə, "Sumqayıt" çox yaxşı komandadı. Məncə, bunu sübut etdilər. Görünən odu ki, üzərində düşünməli olduğumuz məqamlar var.

- Yəqin ki, baş məşqçi nəticədən razıdı. Bəs, narazı qaldığı məqamlar varmı?
- Qalib gələndə xoşbəxt olursan. Bunu çətinliklə edəndə daha zövqlü olur. Əlbəttə, birinci hissədə göstərdiyimiz oyunu axıra qədər oynasaq, daha yaxşı olardı. İkinci hissədə Samir Abasovun əvəzetmələri öz sözünü dedi.

- Matçın iki fərqli hissədən ibarət olması fiziki hazırlığın səviyyəsindən asılıdı?
- Məncə, yox. Sadəcə, futbolçular hesabı qorumağa üstünlük verdi. Həm də təbii ot örtüyündə məşq edib sünidə oynamaq müəyyən dərəcədə təsirini göstərir.

- Kurban Berdıyev "Turan Tovuz"a böyük hədəflərlə gəlib. İlk iki turda rəqiblərin oyununu izlədiz. Sizcə, heyət hədəf üçün yetərlidimi?
- Oyundan-oyuna daha yaxşı hazırlaşıb keyfiyyətimizi artıracağıq. Mövsümün sonunda nə olacağını təkcə Allah bilir.

- Şəhriyar Əliyev əvəzləndikdən sonra üç müdafiəçiylə çıxış etməyə başladız. Kapitan yorulmuşdu, yoxsa strategiya belə idi?
- Elə oyunçular var ki, süni ot örtüyündə sona qədər tab gətirə bilmir. Strategiyaya gəlincə, dəyişiklik etdiyimizi düşünmürəm.

- Tovuz azarkeşləri haqda təəssüratlarınız necə oldu?
- Məni yaxşı mənada təəccübləndirdilər. Hər birinə əla atmosfer yaratdıqlarına görə, təşəkkür edirəm. Çətin vəziyyətlərdə dəstək lazım olduğunu anlayırdılar. Bunu dərk etmələri möhtəşəmdi.

- Otto Con ilk iki turda çox çalışsa da, qol vura bilmədi. Komandaya qol vura bilən hücumçu transfer edəcəksiz?
- Ona inanıram. Görünür, daha çox vaxta ehtiyacı var. Məşqlərdə də özünü yaxşı tərəfdən göstərir. İnanıram ki, tezliklə qollar vuracaq.

KƏNAN BAHADIR