İyunun 5-də və 9-da Libertadores Kubokunun (LK) qrup mərhələsinin təxirə salınan iki oyunu keçirildi.

“Football-plus.az” xəbər verir ki, bununla da Cənubi Amerikanın ən nüfuzlu klub turnirinin 1/8 finalının sonuncu komandası da məlum oldu.

Qeyd edək ki, son oyunlardan əvvəl pley-offun 16 iştirakçısından 15-i məlum idi. Yalnız C qrupunda “Stronqest”dən sonra 1/8 finala ayrılan ikinci vəsiqə sahibini gözləyirdi. Ona görə ki, bu qrupda “Qremio”nun iştirakı ilə nəzərdə tutulan iki oyun Braziliyadakı daşqın və sel fəlakəti səbəbindən təxirə salınmışdı. Pley-offun son iştirakçısı ilə 3-cü yerin sahibi məhz bu oyunların nəticələrindən sonra müəyyənləşəcəkdi. Bu suallara 4-cü turdan təxirə salınan matçda cavab tapıldı. “Uaçipato”nu Çilidə İspaniya yığmasının 35 yaşlı sabiq hücumçusu Dieqo Kostanın yeganə qolu ilə məğlub edən “Qremio” 1/8 finala vəsiqə qazandı. Braziliya klubu 5-ci turdan təxirə salınan oyunda “Estudiantes”ə qalib gələcəyi halda qrupu lider kimi başa vuracaqdı. Lakin Argentina komandası ilə ev oyunu 1:1 hesabı ilə nəticələndi və “Stronqest” daha çox qol vurduğu üçün 1-ci yerdə qaldı. 3-cü yerin sahibi “Uaçipato” isə mübarizəni Sudamerikana Kubokunun 1/8 finalında davam etdirəcək.
Artıq LK-da bu mərhələnin cütləri müəyyənləşib. İlk oyunları avqustun 14-16-sı aralığında keçiriləcək 1/8 finalda rəqiblər belə formalaşıb: Qremio (Braziliya) – Fluminense (Braziliya), San Lorenso (Argentina) - Atletiko Mineyro (Braziliya), Kolo Kolo (Çili) – Xunior (Kolumbiya), Penyarol (Uruqvay) – Stronqest (Boliviya), Talyeres de Kordoba (Argentina) - River Pleyt (Argentina), Botafoqo (Rio de Janeyro, Braziliya) - Palmeyras (Braziliya), Nasyonal (Uruqvay) - San Paulu (Braziliya), Flamenqo (Braziliya) - Bolivar (Boliviya).

C qrupu
4-cü turdan təxirə salınan oyun
Uaçipato (Çili) - Qremio (Braziliya) 0:1
Dieqo Kosta, 6.
5-ci turdan təxirə salınan oyun
Qremio - Estudiantes (Argentina) 1:1
Kristaldo, 48 – Mendes, 83.

1. Stronqest 6 3 1 2 8-6 10
2. Qremio 6 3 1 2 7-5 10
3. Uaçipato 6 2 2 2 7-9 8
4. Estudiantes 6 1 2 3 7-9 5
Bombardirlər: Pedro (Flamenqo), Borxa (River Pleyt), Fransisko da Kosta (Bolivar), Paulinyo (Atletiko Mineyro), Silvera (Penyarol) - 5.