MY darmadağın etdi, “Tottenhem” çətin qələbə qazandı - İCMAL
Həftəiçi Liqa kubokunda 1/16 final mərhələsinin 9 oyunu keçirildi.
Premyer-liqa əvvəlki mərhələlərdə üç təmsilçisini – “İpsviç”, “Bornmut” və “Nottingem Forest”i itirmişdi. Qalan elita klublarına gəlincə, “Mançester Yunayted” “Barnsli”ni darmadağın etdi. “Qarabağ”ın Avroliqanın əsas mərhələsindəki rəqibi “Tottenhem” 88-ci dəqiqəyə qədər uduzduğu oyunun axarını dəyişə, 1/8 final mərhələsinə adlaya bildi. “Brayton” “Vulverhempton”u, “Sauthempton” “Everton”u mübarizədən çıxardı. Elita təmsilçilərindən “Brentford” və “Kristal Pelas” da aşağı liqa klublarının öhdəsindən gəldi. Bu mənada yalnız “Fulhem” büdrədi. “Bağbanlar” penalti seriyasında “Preston”a uduzdu. İndiyə qədər Liqa kubokunun tarixində 34 zərbənin yerinə yetirildiyi seriya olmamışdı. Komandalar 31 zərbəni qola çevirdi.
Daha iki cütdə aşağı dəstə klubları üz-üzə gəldi. Çempionşipdə mübarizə aparan “Stok Siti” və “Şeffild Uensdey” də 1/8 finalda oynamaq hüququ qazandı.
Xatırladaq ki, Liqa kubokunun son qalibi “Liverpul”du. “Qırmızılar” finalda “Çelsi”ni məğlub etmişdi.
1/16 final
Mançester Yunayted – Barnsli (D-3) 7:0
Reşford, 16; 58. Antoni, 35-p. Qarnaço, 45+2; 49. Eriksen, 81; 85.
MY: Bayındır, Kollier, Evans (De Liqt, 78), Maquayr, Dalot (Mazraui, 63), Uqarte (Fernandeş, 62), Kazemiro, Qarnaço (Diallo, 84), Eriksen, Antoni, Reşford (Zirkzee, 63).
Koventri (D-2) – Tottenhem 1:2
Tomas-Asante, 63 – Spens, 88. Conson, 90+2.
Tottenhem: Forster, Udoci (Spens, 46), Devis, Drequşin, Qrey, Berqvall (Meddison, 62), Bentankur, Sarr, Verner (Kulusevski, 74), Solanke (Son Hın Min, 62), Odober (Conson, 18).
Brayton – Vulverhempton 3:2
Baleba, 14. Adinqra, 31. Kadıoğlu, 85 – Qedeş, 44. Doyl, 90+1.
Everton – Sauthempton 1:1, p. – 5:6
Dukure, 20 – Harvud-Bellis, 32.
Brentford – Leyton Orient (D-3) 3:1
Karvalyo, 17. Damsqor, 26. Norqor, 45 – Kuper, 11.
KPR (D-2) – Kristal Pelas 1:2
Fild, 53 – Nketia, 16. Eze, 64.
Preston (D-2) – Fulhem 1:1, p. – 16:15
Ledson, 35 – Nelson, 61.
Stok Siti (D-2) – Flitvud (D-4) 1:1, p. – 2:1
Rouz, 54 – Bennet, 90+1.
Blekpul (D-3) – Şeffild Uensdey (D-2) 0:1
Bernard, 34.
“Uimbldon” (D-4) – “Nyukasl”, “Çelsi” – “Barrou” (D-4), “Mançester Siti” – “Uotford” (D-2), “Uolsoll” (D-4) – “Lester”, “Uikomb” (D-3) – “Aston Villa”, “Arsenal” – “Bolton” (D-3), “Liverpul” – “Vest Hem” oyunları sentyabrın 24-25-də keçiriləcək.
Oyundan sonra
Erik ten Haq, MY-nin baş məşqçisi:
“Mənim üçün yox, komanda üçün ideal gecədi. Düşünürəm ki, planlaşdırdığımız hər şeyi edə bildik: bir neçə əla qol vurduq, azarkeşləri əyləndirdik. Oyun modelimiz üzərində işlədik, bu üzdən xoşbəxtik”.
