Vitali Borisovun taleyinə bu həftə aydınlıq gələcək – federasiya islahatlara başladı
Futzal yığmamızın və “Araz-Naxçıvan”ın baş məşqçisi Vitali Borisovun uğursuzluqları sıralanır.
Əvvəlcə “qırmızı-ağlar” çıxış etdiyi Çempionlar Liqasında qrupu 2-ci pillədə tamamladı və ilkin mərhələdə mübarizəni dayandırdı. Ardından millimiz Çexiya ilə keçirdiyi hər iki yoldaşlıq oyununda uduzdu – 0:3, 2:6.
Bəs nəticələr Borisovun ölkəmizlə bağlı karyerasına necə təsir edəcək? Onun vəzifəsindən azad edilməsi mümkündümü?
Bu suallarla Futzal Federasiyasının İcraiyyə Komitəsinin üzvü və “Araz-Naxçıvan”ın vitse-prezidenti Mahmud Sadıqova müraciət etdik. Onun “Football-plus.az”a söylədikləri:
“Bu həftə Vitali Borisovla danışıqlar aparıb yekun qərarımızı verəcəyik. Bilindiyi kimi, yığmaya gənclər cəlb olunur və yeni komanda qurulur. Rəhbərliyin qərarıyla yığma sırf yerli futzalçılardan təşkil olunacaq. Bu həm də UEFA-nın çox ciddi yanaşdığı məsələdi. Yerli oyunçuların yetişdirilməsinə köklənməliyik. U-19 millisiylə bağlı planlar da bu yöndə olacaq. Bu üzdən Vitali Borisovla bağlı müxtəlif variantlar var. Bütün gücünü milliylə bağlı planlara yönəltməsi üçün “Araz-Naxçıvan”ı başqa mütəxəssisə tapşırmaq variantı da nəzərdən keçirilir. Lakin hələ yekun qərar verilməyib. Dediyim kimi, bu həftə konkret addım atılacaq”.
KƏNAN BAHADIR
