2022/23 mövsümündə Misli premyer-liqasının qalibi olan “Qarabağ”ın müdafiəçisi Elvin Cəfərquliyevin “Football-plus.az”a müsahibəsi.

- Azərbaycan çempionu olduz. Hansı hissləri keçirirsən?

- Şükürlər olsun ki, hər şey bizim üçün yaxşı qurtardı. Çempion olduq. Bütün “Qarabağ” ailəsini, camiəsini, məşqçilər korpusunu, komanda yoldaşlarımı təbrik edirəm. “Qarabağ”ın 10-cu çempionluğu idi. Bu, bizim üçün ikiqat sevindirici oldu.

- Budəfəki çempionluğu dəyərləndirsək, çətin oldu, yoxsa asan?

- Əlbəttə ki, çətin oldu. Bütün komandalar bizə qarşı xüsusi motivasiya ilə mübarizə apardı. “Sabah”ı xüsusi vurğulayardım. Onlar hamını yaxşı mənada təəccübləndirdi. Çox yaxşı çıxış etdilər. Həqiqətən də bizə çətinlik yaratdılar. Şükürlər olsun ki, çempion olmağı bacardıq.

- Çempionatda yeni komandalar var idi. “Kəpəz”, Turan Tovuz” səfərlərinə yollandız. Bunları nəzərə alaraq premyer-liqanın ab-havası haqda nə deyə bilərsən?

- Azarkeşlik baxımından ürəkaçan çempionluq olmadı. Oyunlarımıza o qədər də çox fanat gəlmədi. Az oldu. Amma komandaların sayı nə qədər çox olsa, bir o qədər yaxşıdı. Region təmsilçilərin sayı artmalıdı. Çünki çempionatı həmin rəqiblər maraqlı edir. Regionlarda futbola daha çox maraq var. Həmin oyunlara azarkeşlərin həddən artıq marağı olur. Fanat olan yerdə də futbol daha gözəl olur.

- Ötən mövsüm Çempionlar Liqasının qrup mərhələsinin bir addımlığında mübarizəni dayandırdız. Həmin vaxt rəhbərlikdən tutmuş, sıravi içkiyə kimi hamı inanırdı ki, yenidən Avropanın əsas klub turnirinə vəsiqə qazanacaqsız. İndi vəziyyət necədi?

- Əsas hədəfimiz budu. Qarşımızda bir məqsəd var ki, daha da güclü olaq. Ötən mövsüm nəsib olmadı. İnşallah, yeni “futbol ili”ndə Çempionlar Liqasına vəsiqə qazanmaq istəyirik. Əlimizdən gələni edəcəyik.

- İyunda milli komandanın vacib oyunu var. Estoniya ilə matçdan nə gözləyirsən?

- Millinin nəticələrinə görə azarkeşlər narazıdı. Haqları da var. Çünki son oyunlarda nəticələr ürəkaçan deyil. İndi qarşıdakı görüşləri düşünməliyik. Əlimizdən gələni edəcəyik ki, Estoniyaya qalib gələk. Azarkeşlərimizə haqq verirəm. Çünki onlar bizdən nəticə tələb edir. Belə olmayanda, onların etirazını normal qarşılamaq lazımdı. Estoniya ilə oyuna yaxşı hazırlaşacağımıza söz verirəm.

- Hamını maraqlandıran bir məsələ var. Qol vurandan sonra sevincini kobra işarəsi ilə qeyd edirsən? Bununla bağlı nə deyə bilərsən?

- Elə bil xüsusi önəm daşımır. Bir çox futbolçuların özünəməxsus sevinci var. Mən də düşündüm, ağlıma bu gəldi. Ona görə də qol vurandan sonra kobra işarəsini göstəririəm. Təbii ki, sevdiyim heyvandı. Həm də maraqlı görünür (gülür).

İLKİN SULTANLI