"Tottenhem"in baş məşqçisi "Qarabağ"la oyuna qədər istefa verəcək? - özü açıqladı
“Qarabağ”ın Avropa Liqasının liqa mərhələsindəki rəqibi "Tottenhem"in "Arsenal"a məğlub olandan sonra (0:1) ciddi problemlərlə üzləşdiyini yazmışdıq.
"Football-plus.az" xəbər verir ki, hələ də "mahmızlar"ın düşərgəsində emosiyalar sakitləşməyib. Üstəlik İngiltərə mətbuatında baş məşqçi Ange Postekoğlunun istefa verəcəyi haqda iddialar yayılıb.
Komanda bu gün "Brentford"u qəbul edəcək. "Football.london"un məlumatına görə, çalışdırıcı matçdan əvvəl keçirilən mətbuat konfransında haqqında yayılan xəbərlərə aydınlıq gətirib:
"Azarkeşlərin mövcud vəziyyətdən narazı olduğunun fərqindəyik. 13-cü yerin onları qane etmədiyini bilirik. Məğlubiyyət və ya heç-heçə o demək deyil ki, meydanda döyüşmürük. Biz ilk 4 oyunda meydana qələbə qazanmaq məqsədilə çıxmışıq. Məncə, nəyisə dəyişməyə ehtiyac yoxdu. Əsas məsələ yaxşı oynamaqdı və bunu bacarırıq. Belə davam etməliyik. Əminəm ki, əziyyətimizin mükafatını alacağıq. "Tottenhem"də tez-tez baş məşqçi dəyişikliyi yaşanır. Hətta bir müddət əvvəl son illərdə bu postda ən uzun müddət qalan baş məşqçi olduğuma görə mənə tort bağışladılar” (gülür).
Mütəxəssis zədəli futbolçuların son durumundan da bəhs edib:
"Uilson Odoberin durumu yaxşıdı. İv Bissuma isə srağagün məşqlərə qoşuldu. Timo Verner də tam sağalıb. Amma Rişarlison üçün bir qədər zaman lazımdı".
Xatırladaq ki, "Tottenhem" - "Qarabağ" oyunu sentyabrın 26-sı, saat 23.00-da başlayacaq.
KƏNAN BAHADIR
Digər xəbərlər
