Çoxdan gözlənilən dönüş baş tutub: Corco Kyellini Turinə qayıdıb.

“Yuventus”un sabiq kapitanı İtaliya klubunda rəhbər vəzifələrdən birinə təyinat alıb. Turin klubunun rəsmi saytının yaydığı xəbərə görə, o, “Yuventus”un milli və beynəlxalq futbol qurumları ilə əlaqələrində vasitəçilik edəcək. Kyellini artıq sentyabrın 16-da institusional futbol əlaqələri rəhbəri kimi fəaliyyətə başlayacaq.

Avqustun 14-də Kyellininin 40 yaşı tamam olub. 2023-cü ildə futbolçu karyerasını “Los Anceles”də başa vuran sabiq müdafiəçi “Yuventus”da 2005-22-ci illərdə çıxış edib.

Turinlilərin heyətində 9 dəfə İtaliya çempionu olub, 5 dəfə ölkə kubokunu və 5 dəfə isə İtaliya superkubokunu qazanıb. Onun İtaliya yığması ilə AÇ-2020-nin qalibi olduğunu da xatırladaq.