"Qarabağ" Misli premyer-liqasının 6-cı turunda evdə "Səbail"i məğlub etdi - 2:1.

"Football-plus.az" xəbər verir ki, "dənizçilər"in baş məşqçisi Qurban Qurbanov matçdan sonra keçirilən mətbuat konfransında jurnalistlərin suallarını cavabladı.

- Futbolçularımı təbrik edirəm. Vacib qalibiyyət idi. Heyət tam hazır deyildi. Zədəlilərimiz və millilərin oyunlarından qayıdanlar var idi. Xeyli qol epizodu yaratdıq. Hamısından istifadə edə bilmədik. Səviyyəni qaldırmalıyıq ki, oyunçular müəyyən səhvləri etməsinlər. Bu üzdən, qol buraxdıq. Hansı ki, rəqib bizi səhvə məcbur etdi.

- AFFA İcraiyyə Komitəsinin iclasından sonra strategiyanın yazılması barədə bir çox şəxslərin fikrinin, təklifinin dinlənildiyi deyildi. Sizin də təklifləriniz olacaqmı?
- İclaslarda hər kəs fikir bildirir. Lakin bu işə bəzi təcrübəli şirkətlər də cəlb olunub. Çox güman ki, onların fikirlərini daha çox önəm veriləcək. Bəzi məsələlərdə köməyə ehtiyac olduğunu görsək, yardımçı ola bilərik.

- Komanda həm avrokuboklarda, həm ölkə kubokunda, həm də premyer-liqada çıxış edəcək. Bu, futbolçuların fiziki durumuna necə təsir edəcək?
- Bu dəfə daha çox güc sərf etməli olacağıq. Premyer-liqa klubları güclənib, qarşılarına böyük hədəflər qoyublar. Avrokuboklarda da oyunlar keçirməliyik. Zədəlilərimiz nə qədər az olsa, bir o qədər yaxşıdı.

- Aleksey Kaşukun iştirak ərizəsində olmaması normaldı. Hələ formada deyil. Bəs nə vaxt hazır olacaq?
- Tam hazır olması üçün hələ zaman lazımdı. Yəqin ki, bir neçə oyun sonra meydana buraxa biləcəyik.

- Redon Cicanın xidmətində az hallarda müraciət edirsiz. Avropa Liqasının liqa mərhələsi üçün iştirak ərizəsinə də salınmadı. Bu, ona artıq ehtiyacınız olmadığı mənasın gəlir?
- Xeyr, Cica komanda üçün vacib oyunçudu. Avrokuboklarda limit olduğu üçün onun adını iştirak ərizəsinə sala bilmədik. Hücumçulardan Musa və Nərimanı həmin siyahıdan çıxarsaq, yenə Cicanı əlavə edə bilməyəcəyik.

- Həmişə milliylə bağlı suallardan qaçırsız. Yığmamızın keçirdiyi iki oyun sizdə hansı təəssüratları oyatdı?
- Qaçmamışam, sadəcə, fikir bildirməmişəm (gülür). Bu gün iki oyuna görə danışmaq düzgün olmaz. Həmçinin, həmkarlarımızın işinə hörmətlə yanaşmalıyıq. Bu dəfə də fikir bildirməsəm yaxşı olar.

- Yay "transfer pəncərəsi" "Qarabağ" üçün bitib?
- Çox güman ki, bəli. Danışıq apardığımız oyunçulardan müsbət siqnal ala bilməmişik. Razılığın alınmamaq ehtimalı daha çoxdu, nəyin ki, alınmaq.

KƏNAN BAHADIR