Misli premyer-liqasında ilk 5 turdan sonra “Turan Tovuz” 13 xalla liderdi.

Tovuzluların cari mövsümdəki uğurları ilk növbədə Kurban Berdıyevin təcrübəsi ilə izah olunur. Bəs futbolçular?! Komandanın braziliyalı hücumçusu Aleks Souza ilə söhbətdə bəzi suallara cavab tapmağa çalışdıq.

- Hazırda Misli premyer-liqasında 5 tur geridə qalıb. Ümumi qənaətin necədi? Çempionatın səviyyəsi dəyişibmi?
- Hələ irəlidə çox oyun var. Başqa favoritlərin adını çəkmək istəməzdim. Amma futbolda hamı necə oynayacağını bilir. Ona görə də biz hər gün çox məşq edib, oyunlarda qalib gəlməyi və “Turan Tovuz”u zirvədə saxlamağı bacarmalıyıq.

- “Turan Tovuz”u gələn yay avrokuboklarda görə  bilərik?
- Biz işləyirik və işimiz meydana çıxıb oynamaqdı. Daha çox və keyfiyyətli işləməliyik.

- Maraqlıdı ki, “Turan Tovuz” hələ də qapısında qol görməyib. Səncə, bu, qapıçının, oyunçuların, yoxsa məşqçinin əməyidi?
- Təbii ki, kollektivin. Bu uğurda bütün futbolçuların rolu var.

- Kurban Berdıyevin “əl işi” kənardan hiss olunur. Bəs komanda üzvləri nə hiss edir?
- Həmişə yeni şeylər öyrədir, əla məşqçidi. Hər gün inkişaf etmək üçün nə etməli olduğumuzu bizə göstərir.

- Berdıyev kənardan sakit adam kimi görünür. Komandada necədi?
- Sakit insandı, amma həmişə səndən 100 faiz tələb edir.

- Ayxan Abbasovla Kurban Berdıyevi müqayisə edə bilərsən?
- Mən məşqçiləri müqayisə etməyi sevmirəm, düşünürəm ki, hər birinin özünəməxsus xüsusiyyətləri var.

- Ötən mövsüm qollarla seçilirdin. Amma zədədən sonra məhsuldarlığın aşağı düşüb.
- Yenidən qollar vurmaq üçün müntəzəm məşq edirəm. Əvvəlki formamı bərpa etməyə çalışıram.

- Bir futbolçu kimi özünü nə dərəcədə Azərbaycana və Tovuza aid hiss edirsən?
- Söhbət aid olmaqdan yox, fürsətlərdən gedir. Azərbaycana gəlib oynamaq imkanım yarandı və mən burda xoşbəxtəm...

- Ölkəndə  sənə “Turan Tovuz”la bağlı suallar verilirmi, onlar bizim komandaları izləyirmi? Ümumiyyətlə, dostlarınızdan kiməsə Azərbaycanda oynamağı tövsiyə etmisiz?
- Braziliyalı oyunçulara nə vaxt maraq olsa, həmvətənlərim mənə mesaj göndərirlər ki, ölkə və futbol haqda soruşsunlar. Bildiklərimi deyirəm. Amma Azərbaycan və komandam Braziliyada o qədər də məşhur deyil. Lakin soruşanda həmişə böyük məmnunlqula cavab verirəm.

RÖYANƏ OĞUZ