“Zirə”nin yeni transferi Yusuf Laval hamıya tanış simadı. 2020-ci ilin yayında “Neftçi”yə gələn nigeriyalı “ağ-qaralar”ın sevimlisinə çevrilməyi bacarmışdı.

Laval 2011-ci ildə Nigeriyanın Laqos şəhərini təmsil edən "36 Layan" gənclər komandasının bir parçası olur. Oyun üslubu baxımından Obafemi Martinsə oxşadığına görə “Obaqol” ləqəbini qazanır. Yusuf 2017-ci ilin yayında "Lokeren"lə “3+1” illik müqavilə imzalayır.

Laval 2020-nin iyulunda "Neftçi"yə gəlir, “2+1” illik müqavilə bağlayır. Həyatındakı ilk çempionluq sevincini də Bakıda yaşayır. Amma 2023-cü ilin yanvarında yüksək məbləğ qarşılığında Portuqaliya "Aroka"sına keçir. Hücumameyilli yarımmüdafiəçi ilə 3,5 illik müqaviləyə imzalanır. Yusuf seçimini belə açıqlayır: “Aruka”nı seçdim, çünki azarkeşlərlə çox sıx əlaqəyə malik gözəl klubdu. Komandanın mümkün olan ən yüksək uğuru qazanmasına kömək etmək istəyirəm. Burda böyük uğurlar qazanmağı hədəfləyirəm”.

“Aroka” Portuqaliya elitasının son mövsümündə 7-ci yeri tutub. Yusuf isə 17 oyunda meydana çıxsa da, bir qol da vurmayıb. Komandanın yeni baş məşqçisi Qonsalo Qarsiya (Daniel Souzanı əvəz edib) nigeriyalının xidmətinə ehtiyac duymadığından onunla yollar ayrılıb.

“Neftçi"nin son çempionluğunda önəmli pay sahibi olmuş Laval dünən “Zirə” ilə anladşı. Aylıq maaşı 10 min dolları keçməyən sabiq 24 nömrənin yeni klubunda çox da yüksək olmayan maaşa oynayacağı deyilir.

RÖYANƏ OĞUZ