“Yenə məğlubiyyət, yenə məyusluq. Matçı Polşadan olan hakimlər briqadası idarə edirdi. Penalti epizodu barədə onu deyə bilərəm ki, bəli, Amin Seydiyevin rəqibi qarşılamaq istədiyi mövqe düzgün deyildi. Rəqiblə üzbəüz dayanmaq lazımdı. Yüz faiz təmas var idi. Həmin gün komandamızda ən zəif oyunçu da elə Amin idi. Yaxşı ki, hissənin axırına yaxın əvəzlədilər. Həyəcan idi, yoxsa nədi - bilmədim. Yığmada oynamaq hər futbolçu üçün şərəf olmalıdı. Psixoloji durum da önəmlidi futbol aləmində. Amin Seydiyev bu baxımdan oyuna hazır deyildi. Lazımsız penaltı, dəqiqələr sonra yenə onun tərəfindən səhv ötürmə, 5 futbolçu arasından keçirilən ötürmə və qol. Həm də hansısa qayda pozuntusu zamanı hakimə qarşı aqressiv davranmaq olmaz. Bu, etiraz əlamətidi. Hələ əl-qol, jest ilə heç lazım deyil. Hakim fit verdisə, ona əməl etmək lazımdı. Oyuna nəzarət edən, idarəçi odu. "Fit sahibi"nə baxan inspektorlar var ki, fərqli-fərqli ölkələrdən gəlirlər.

Futbolçularımız iki dəfə etiraza görə sarı vərəqə aldılar. Bu qərarlar doğru idi. Hətta Şəhriyar Əliyevin yersiz sarı vərəqəsinə məna verə bilmirəm. Hər bir futbolçu belə məqamlardqa diqqətli olmalıdı. Referinin meydanda verdiyi qərar birmənalı şəkildə icra olunmalıdı. Bunu futbolçularımiz başa düşməlidi. Əvvəl klublarımız barədə deyirdim, amma artıq yığmada da görürəm. Həm psixoloji durum, həm də davranış mədəniyyəti tənzimlənməlidi. Futbolçular yığmada daha məsuliyyətli olmalıdı. Klub ayrı, yığma ayrı. Hakimin köməkçiləri ilə əlaqəsi yaxşı idi. Belə başa düşdüm ki, Avropa təcrübəsi böyük deyil, Polşadan olmasına baxmayaraq, az idi. Ümumən oyunun öhdəsindən gəldi. Oynamağa imkan yaratdı, hər xırda folda fit çalmırdı. Mübarizəli futbola önəm verirdi. Oyunun idarəçiliyi yaxşı qiymətləndirmək olar. Referi işini gördü, matçın öhdəsindən gəldi, verdiyi qərarlar qaydalar çərçivəsində idi. Penalti epizodunda hətta VAR-a da baxılmadı. Çünki onun tutduğu mövqedən hər şey aydın görünürdü. İsveçlə oyunda isə referi qərarı VAR-ın təlimatından sonra verdi. Yəqin ki, Fernando Santuş bu iki məğlubiyyəti araşdırar”.