Ölkə çempionatının 20-ci turunun "Zirə" - "Sabah" oyununda yaşanan hadisə az qala partlayış effekti verdi.

"Qartallar" uzatma dəqiqələrində təyin olunan penaltidən qol buraxaraq uduzdu. Amma o penalti olmaya da bilərdi. Bunun üçün sadəcə, Amin Seydiyev Qurban Qurbanov kimi davranmalı, “ədalətli oyun” qaydalarına əməl etməliydi. Amma etmədi!

Bir daha xatırladaq: Qismət Alıyev 90+4-cü dəqiqədə künc zərbəsini yerinə yetirir. Ön dirəyə doğru gələn top Aminə dəyərək meydanı tərk edir. Epizodu görməyən hakim növbəti dəfə korner təyin etmək əvəzinə “qapıdan zərbə” qərarı verir. Belədə “Sabah” sürətli əks-hücum qurur və məlum penalti epizodu reallaşır. Görəsən, Amin hakimə yaxınlaşıb topun ona toxunandan sonra meydanı tərk etdiyini deyə bilməzdi? Təbii ki, bilərdi və elə oyundan sonra Qismət Alıyevə bunu etiraf edib.

“Football-plus.az” məsələnin mahiyyətini araşdırmaq üçün Amin Seydiyevlə əlaqə saxlamağa çalışdı. O isə danışmaqdan birmənalı şəkildə boyun qaçırdı. Haqlısansa, niyə susursan? Haqsızsansa, niyə səhvini boynuna almırsan?

ƏSƏD SEYİDOV