“Avrokubok oyunlarında ilk mərhələlər bir az daha məsuliyyətli olur. Ona görə də bəzən futbolçuları bu məqamlarda anlayıram. İlk görüşdə 30 minə yaxın azarkeşin gözü qarşısında bir az həyəcan, bir az da havanın hərarəti təsir etdi. Amma “Qarabağ” səfərdəki oyunu ilə bütün Bolqarıstanı şoka saldı. Oyun bizim üçün çox yaxşı başladı, artıq 7-ci dəqiqədə qol vurduq. Təəssüf ki, qısa zamanda da cavab gəldi. Bilmirəm qapıçı nə işlə məşğul idi, qollarda top əvəzinə niyə rəqib oyunçuya yumruq atırdı... Adətən, "Qarabağ"a transfer olunan futbolçular tez uyğunlaşır, amma bu oyunda hiss etdim ki, Buntic heyətə tam uyğunlaşa bilməyib. Bu baxımdan bir az əziyyət çəkirdi. Ancaq kollektiv oyun baxımından Qurban Qurbanovu təbrik edirəm. İtaliyadan olan hakimlər briqadasının işinə gəlincə, Sozzanın müəyyən artıq çəkisi görünürdü. Amma oyuna xələl gətirmədi, ilk dəqiqələrdən çalışırdı ki, oyunun içində olsun. Baxmayaraq ki, bolqarlar bir az kobud futbol oynamağa meyilli idi, amma hakim o oyun üslubuna tez alışdı. Verdiyi qərarlar da düzgün idi. Birinci penaltidə VAR-ın müdaxilələsi oldu, amma hissənin sonunda "Ludoqorets"in qapısına təyin etdiyi 11 metrlik zərbəylə obyektivliyini göstərdi. Həmçinin verdiyi sarı vərəqələr də yerində, köməkçiləri ilə əlaqəsi yaxşı idi. Fikir ayrılıqları ekran qarşısında olunmurdu. Heç bir klub hakimlikdən gileylənməməlidi. Oyun tam obyektiv, ədalətli idarə edildi. Sozzanın çəkisini bir qədər azaltması daha məqsədəuyğundu”.