“Trabzonspor”un Abdulla Avcı ilə yollarını ayırdığını xəbər vermişdik.

Rəhbərliyin yeni məşqçi seçimi çox da uzun çəkmədi. Şenol Günəş ilə Fatih Təkkə arasında seçim edən rəhbərlik üstünlüyü birinciyə verdi. Ünlü mütəxəssis ilə ikiillik müqavilə imzalandı. Bununla da “bordo-mavililər”də 5-ci Günəş dönəmi rəsmən start götürdü. 72 yaşlı çalışdırıcı daha öncə 1987-88, 1992-96, 2004-05 və 2009-13-cü illərdə “Trabzonspor”da çalışıb. Bu müddət ərzində o, qaradənizlilərin başında 2 kubok, 2 superkubok olmaqla 4 titul qazanıb. Onun son dönəmi 2013-cü ilin yanvarın 27-də başa çatmışdı. Yəni 12 ilə yaxın bir müddətdən sonra Günəş yenidən komandanın başına keçdi.

Maraqlıdı ki, onun Trabzonda 5-ci dönəmi sabiq klubu “Beşiktaş”a qarşı oyunla start götürəcək. Günəş hər nə qədər “Trabzonspor”un əfsanəsi sayılsa da, məşqçi kimi hər iki çempionluğunu məhz “Beşiktaş”la qazanıb (2015/16, 2016/17). Türkiyə futbol tarixinin ən önəmli məşqçilərindən hesab olunan Günəş yeni təyinatı ilə bağlı bunları deyib: “Trabzona yeni gəlmirəm. Amma bu dəfə dərqli duyğularla gəlirəm. İşimi yerinə yetirmək üçün gəlmişəm. Məndən öncə burda Abdulla Avcı uğurlu işlər gördü. Komanda son oyuna İhsan Təkəlioğlu ilə çıxmışdı. Yeni bir dönəm başlayır. Başqan və idarə heyəti mənimlə görüşmək istədi. “Gəl” dedilər, mən də gəldim. Komandanın durumunu dəyərləndirəcəyik.

“Trabzonspor” asan dönəmdən keçmir. Psixoloji durumu düzəldib yeni və daha güclü bir komanda yaratmaq istəyirik. Sözlə ifadə etmək doğru deyil, amma özümü yeni bir işə başlayan məşqçi kimi hiss edirəm. Həyəcanım gənclik illərindəki kimi deyil. Gəncliyimdə həyəcanı idarə etmək çətin idi. İndi isə duyğularla məntiqin birləşdiyi bir dönəmdəyəm. Ümid edirəm ki, məndən gözlənilənləri verə biləcəm”. Günəşin əsas köməkçiləri uzun illər onunla birlikdə çalışan Şərəf Çiçək ilə “Trabzonspor” camiəsinə gözəl tanış olan Hüseyin Çimşir olacaq. 45 yaşlı Çimşir daha öncə bu klubda 2018/19-da köməkçi-məşqçi, 2020-ci ildə isə baş məşqçi funksiyasını yerinə yetirib.

Günəşin gəlişi ilə heyətdə dəyişikliklər başladı. İlk növbədə komandanın aparıcı futbolçularından olan Mahmud Trezeqenin ayrıldığını bildirək. 2022-dən “Trabzonspor”da olan və ötən mövsüm 28 rəsmi oyunda 11 qol, 6 məhsuldar ötürməlik fayda verən 29 yaşlı misirli vinger Qətər təmsilçisi “Əl-Rayyan”a icarəyə verilib. Əvəzində “Braqa”dan iki yeni futbolçu transfer edilib. Bunlar Simon Banza ilə Sərdar Saatçıdı.

Ötən mövsüm Portuqaliya çempionatında 21 qol vurmaqla diqqət çəkən Banza 2 milyon avro qarşılığında birillik icarəyə götürülüb. 29 yaşlı Konqo DR-li vingerin maaşı 1,16 milyon avro təşkil edəcək. Sərdar isə türkiyəli futbolsevərlərə gözəl tanışdı. “Beşiktaş”ın yetirməsi olan 21 yaşlı mərkəz müdafiəçisi 2022-də “Braqa”ya transfer olunmuşdu.

“Trabzonspor” 2,5 milyon avro ödəyərək bu oyunçu ilə “4+1” illik müqavilə imzalayıb.