Oktyabrın 6-da ''Beşiktaş''dan ayrılan və o vaxtdan bu yana işsiz olan Şenol Günəş ilə bağlı yeni xəbər var.

"Football-plus.az" xəbər verir ki, 71 yaşlı mütəxəssisin hansı komandanı çalışdırmaq istədiyi məlum olub. Türkiyə futbolunda damğa vurmuş məşqçilərdən olan Günəş bir müddət klub futbolundan uzaqlaşmaq istəyir. O, Cənubi Koreya yığmasının başına keçməyin əleyhinə deyil. Bunu uzun illər Günəşin köməkçisi kimi çalışmış Şərəf Çiçək açıqlayıb. Çiçək Cənubi Koreyanın dövlət kanalı KBS-yə açıqlamasında bildirib ki, Günəş Cənubi Koreya Futbol Federasiyasından təklif alacağı təqdirdə bunu böyük məmnuniyyətlə qəbul edəcək. Köməkçisi hətta Günəşin Koreya dilində öyrənməyə başladığını da əlavə edib. Amma bu yaxınlarda Yürgen Klinsmann ilə yollarını ayıran Cənubi Koreya yoluna yerli mütəxəssislə davam etmək arzusundadı. Bunu federasiya rəsmisi Çu Ha Sun açıqlayıb. Martın 21-də koreyalılar DÇ-2026-nın seçmə mərhələsi çərçivəsində Tayland ilə qarşılaşacaqlar. Ona görə də federasiya məşqçi problemini mümkün qədər tez yoluna qoymaq istəyir. Hələ ki, əsas favoritlər ''Ulsan''ın çalışdırıcısı Hon Myun Bo və ölkənin kişilərdən ibarət Olimpiya yığmasının baş məşqçisi Hvan Sun Hondu. Qeyd edək ki, Koreya Günəş üçün heç də yad ölkə deyil. Təcrübəli mütəxəssis 2007-ci ilin yanvarından 2009-cu ilin noyabrına qədər bu ölkənin klubu olan ''Seul''da işləyib. Yığma səviyyəsində isə Günəş indiyə qədər yalnız Türkiyəni çalışdırıb. ''Ay-ulduzlular'' onun başçılığı altında DÇ-2002-də bürünc medallar qazanıblar və iki fərqli dönəmdə 82 oyundan 38 qələbə, 23 heç-heçə, 21 məğlubiyyətlə ayrılıblar.

ƏLİ