"Qarabağ" sabah ÇL-in pley-offunun cavab matçında Zaqreb "Dinamo"sunu qəbul edəcək.

"Football-plus.az" xəbər verir ki, "köhlən atlar"ın baş məşqçisi Qurban Qurbanov matçdan əvvəl keçirilən mətbuat konfransında jurnalistlərin suallarını cavablayıb.

- Oyunun mahiyyəti bəllidi. Çox vacib matçdı. Hesabda geridə olsaqda, qruplarda iştirak etmək üçün böyük şans qazanmışıq. Mərhələni keçmək üçün əlimizdən gələni edəcəyik. Oyuna final matçı kimi hazırlaşmışıq. Rəqibi tanıyırıq. Ambisiyalı və böyük komandadı. Futbolçularıma inanıram. Yaxşı nəticə üçün hər oyunçum karyerasının ən yaxşı oyununu göstərəcək. Maraqlı olacaq.

- Səfərdə məğlub olmusuz. Burda da uduzsaz, belə halı şəxsi faciə hesab etməyəcəksiz?
- Yox, təbii ki. Hər məğlubiyyəti faciə hesab etsək, gərək bu sənətdə çalışmayaq. Bir şeyə həmişə əmin olmuşam ki, hər oyuna çox məsuliyyətlə yanaşmışıq. Məğlubiyyətlərdən nəticə çıxarmalıyıq. Bu oyunda məğlub olmaq istəmirik.

- Qapıda kimin olacağına qərar vermisiz? Və zədəlilərin durumu necədi?
- Qapıçıyla bağlı yekun qərar üçün vaxt var. Veşoviç dünən məşqlərə qoşuldu. Bu gün də məşqdə iştirak edəcək. Ola bilər ki, sabah ilk "23-lük"də olsun. Amma Yankoviç hələ də fərdi qaydada məşq edir.

- Julio Romaonun oynayacağını bilirdizmi?
- Düzü, buna şübhəylə yanaşırdıq. Məlum bəndi incələdikdən sonra bilindi ki, Romao oynayacaq. Dünən UEFA-dan cavab gəldi ki, oynaya bilər.

- Məlumdu ki, "Qarabağ" ilk dəqiqələrdən hücumlar etməlidi. Buna əsasən, xüsusi planınız varmı?
- Qarşımızda böyük Avropa təcrübəsinə və 3 top fərqinə malik "Dinamo" var. Sabah ağıllı şəkildə təzyiq göstərməliyik. Səfərdə onların təhlükəli komanda olduqlarını gördük. Ola bilər ki, "Dinamo" əksini etsin. Yəni rəqib təzyiq göstərsin. Biz cəsarətli olmalı və istənilən təzyiqə dözməliyik. Səliqəli və dəqiq çıxış etmək lazımdı.

- Komandaya yeni futbolçular cəlb olunacaqmı?
- Ümidimiz az olsa da, axtarışlarımız davam edir. Ən pis halda, əlimizdəki heyətlə davam edəcəyik.

- Mərhələni adlayacağınıza böyük inam var. Bu barədə nə deyə bilərsiz?
- Buna mən də inanıram. Meydanda yaxşı mübarizə olacaq. Çoxsaylı hücumlar etməyə çalışacağıq.

- Səfərdəki 0:3 hesablı məğlubiyyət, indiki ab-hava sizə karyeranız boyunca hansı dönəmi xatırladır?
- Bu barədə düşünməmişəm. Deyəcək söz yoxdu. Ola bilər ki, heç kim belə hesabla uduzacağımızı gözləmirdi. Bizim kimi klubların əlinə belə şanslar həmişə düşmür. İlk dəfə ÇL-in pley-offuna yüksələndə sadəcə himni ölkəmizdə eşidəcəyimiz üçün sevinirdik. Hesab haqda düşünmürdük. İndi qrupları arzulayırıq. Təbii ki, bu bizim üçün böyük məsuliyyətdi.

- "Dinamo" daha əvvəl "Sparta Praqa" və "PAOK"u ilk oyunda məğlub etsə də, cavab matçlarında böyük hesablarla uduzub. Həmin oyunlara baxmısızmı?
- Bəli, vurulan və buraxılan qolları izləmişik. Lakin bunu təkcə biz yox, onlar da düşünüb. Nəticədə rəqib də daha məsuliyyətli və diqqətli oynayacaq.

- Bəllidi ki, üç qol vurmaq asan məsələ deyil. Penaltilər seriyasına hazırlaşmısızmı?
- Bütün ehtimallara hazırıq. Amma çox istərdik ki, oyunun taleyi 90 dəqiqədə həll olunsun.

KƏNAN BAHADIR