"Roman Qriqorçukun gəlişini çox yaxşı qiymətləndiririk. Çünki gəlməmişdən öncə olan variantlar arasında ən uyğunu o idi. Azərbaycan futbol sanayəsini tanıdığına, dil məsələsinə, ümumi taktiki və mental dəyərləri bildiyinə görə ən uyğun məşqçilərdən biri də Qriqorçuk idi. Düzdü, çətin oldu, amma onu "Neftçi"yə gətirə bildik. Ümid edirik ki, uğurlu olacaq, yaxşı nəticələr əldə edəcək. Hazırkı durumda edilən transferlər isə öncədən bildiyimiz transferlər idi. İnanıram ki, bundan sonrakı transferlər də keyfiyyətli və hazırlıqlı, düzgün mövqelərə doğru seçimlər olacaq. Ötənilki transferlərdən böyük dərs çıxarmaq lazımdı. Tezbazar alınan, hazır olmayan oyunçulara ehtiyac yoxdu. Ümid edirəm ki, yaxşı bir forvard əldə edəcəklər. Ötən mövsüm taktikada, futbolçu seçimində buraxdığımız nöqsanlar aradan qalxacaq. Düzdü, hazırda bu proseslər idman direktoru Yens Anderssonun nəzarəti altındadı. Lakin Qriqorçukun da istəyi nəticəsində yüksək və dəqiq seçimlə yaxşı oyunçular cəlb edə bilər. Bu mövsüm üçün ümidlərimiz yaranıb. Düşünürük ki, ən azı mübariz bir komanda formalaşacaq. Həm meydanda, həm də meydandan kənarda normal bir "Neftçi" görə biləcəyik".