“Neftçi” ötən həftədən bəri gördüyü işlərlə bəzi suallara aydınlıq gətirib. Xatırladaq ki, Müşahidə Şurasının təsdiqlənməsiylə paralel baş məşqçinin Roman Qriqorçuk olacağına aydınlıq gəlib, heyətdə müəyyən dəyişikliklər edilib. Daha dəqiqi, Ömər Buludov, Rüfət Abbasov, Eddi İsrafilov, Reziuan Mirzov, Ataa Caber və Aqil Məmmədov yola salınıbsa, Emil Səfərov və Edvin Kuçla ortaq məxrəcə gəlinib.

Bununla iş bitirmi? “Ağ-qaralar”ın növbəti mövsüm üçün məqsədi çempionluqdumu? Bilmirik. Heyətdə gözəyarı dəyişikliklər ediləcək, yoxsa ciddi? Bilmirik. Qriqorçukun köməkçiləri kim olacaq? Bilmirik. Ən azı Emin Mahmudov əvvəlki halına dönəcəkmi? Bilmirik. Niyə? Çünki klubla bağlı məsələlər məxfi saxlanılır. Bu azmış kimi, proseslər ləng həyata keçirilir. Təbii ki, yubanmalar üçün əsas tapmaq mümkündü. Bəli, Teymurləng də ləng idi və bu, ona fateh olmaq yolunda problem yaratmadı. Lakin bu gün “Kəpəz”, “Şamaxı”, “Araz-Naxçıvan” kimi büdcəsi az olan klublar da fəallığıyla seçilir, “Neftçi” isə susur.

Görəsən, yuxarıda qeyd olunan suallara nə vaxt aydınlıq gələcək? Azarkeşlərin maraq göstərdiyi məsələlər haqda ətraflı məlumata yiyələnməliyik, ya yox?!
Hər şey yolundaymış kimi görünsə də, komandada ciddi dəyişikliklərə ehtiyac olduğu gün kimi aydındı. Bəlkə də hələ yeni transferləri kimin seçəcəyi bilinmir. İdman direktoru Yens Andersson “sağa sürür”, Qriqorçuk da sola. Əşi, onsuz klub indiyə qədər fikir ayrılıqları ucbatından çox şey itirib.

Azarkeşlərin sonuncu ümid çırağı isə Qriqorçukdu. “Neftçi”nin ölkə çempionatı tarixindəki ən rəzil məğlubiyyətinin səbəbkarı... Bəli, 0:8-i nəzərdə tuturam. 2016-cı ildə keçirilən oyun və Roman Qriqorçukun “Qəbələ”sinin tarixi qələbəsi. Ukraynalı mütəxəssis “ağ-qaralar”ı elə tarixi uğurlara daşımalıdı ki, həmin 0:8-i də unutdursun, son vaxtlar “Qarabağ” önündəki daimi məğlubiyyətləri də. Bacaracaqmı? Başqa yolu yoxdu!

KƏNAN BAHADIR