“Yol yorğunluğu, həm də rəqibin doğma meydanda oynaması işimizi çətinləşdirdi. Komandamız istidən gedib Qəbələdə yağışlı havaya düşdü ki, bu da məğlubiyyətdə rol oynadı. Bizim üçün önəmli olan hesab deyildi, müdafiə və hücum planında futbolçularımızdan istədiyimizi almaq idi. Rəqib fərdi keyfiyyətləri üstün olan futbolçulardan ibarət çox yaxşı komanda qurub. İstər müdafiədə, istərsə də hücumda nə etdiklərini bilirlər. Büdcə baxımından qat-qat üstündülər. “Qəbələ”nin 3-4 futbolçusunu bizim heyətin bütün üzvlərinə bərabər saymaq olardı. Həm legionerlərdən, həm də azərbaycanlı oyunşulardan ibarət çox yaxşı kollektiv formalaşdırıblar. Səviyyəli komandaya qarşı oynadıq. Biz də səhvlərdən nəticə çıxaracağıq. Belə komanda ilə oynamaq bizim üçün təcrübə oldu. Önümüzdə bir ay var. Başqa rəqiblərin indiki durumunu bilmirəm, amma gördüyüm “Qəbələ”ni həm iş, həm də peşəkarlıq baxımından yaxşı qiymətləndirirəm. Ayın 21-də “Qaradağ-Lökbatan”la yoxlama oyunumuz var”.

“Komandamız təlim-məşq toplanışına getmədiyi üçün çempionata tam hazır deyilik. Çalışırıq heyəti həm fiziki, həm taktiki durum baxımından müəyyən səviyyəyə gətirib çatdıraq. Qalan müddətdən bacardıqca səmərəli istifadə etməyə çalışırıq. Transferlər işlərimiz isə davam edir. Üç-dörd yeni oyunçu almaq istəyirik. “Qarabağ”dan, “Səbail”dən, “İmişli”dən bir neçə futbolçu ilə müqavilə imzalamışıq. Təəssüf ki, büdcə problemimiz olduğuna görə yeni transferləri hələ də həyata keçirə bilmirik. Bəzi mövqelərdə boşluqlarımız var, amma danışıqlarımız davam edir. Ən böyük problemimiz maddiyyatdı, AFFA-nın ayırdığı məbləğin kifayət etmir. Çünki işçi heyəti, klubun yol xərcləri, futbolçulara ayrılan pullar və s. var. Komandada cəmi 18 oyunçu var. Bizə başqa qurumlardan sponsor dəstəyi olmasa, məcburuq ki, yeni oyunçu cəlb etmədən yalnız bu futbolçularla davam edək. Futbolçularla razılaşdıqda AFFA-nın ayırdığı büdcəni nəzərə alıb, ona uyğun transferlər etmişik. Sonradan bu mövzuda problem yaranmasını istəmirik. Həm də “Cəbrayıl” 1-ci liqada Qarabağı təmsil edən yeganə klubdu. İstərdim ki, müəyyən qurumlar “Cəbrayıl”a maddi yardım göstərinlər. Klub rəhbəri öz büdcəsindən müəyyən məbləğ ayırır, amma bu da bəs etmir. Təkcə stadionda məşq etməyimiz ayda 5 min manata başa gəlir. Stadion tapmaq çətindi. Məcburiyyətdən “Neftçi”nin köhnə bazasında məşqlərimiz davam edir. İstərdik ki, ən azı 2-3 saat o meydançadan istifadə edə bilək. Təəssüf ki, maliyyə məsələsinə görə bu imkanlardan yararlana bilmirik. Gündə bir saat, bəzən də saatyarım məşq edirik. Rəhbərliyin strategiyası yola gənc oyunçularla davam etməkdi. Kluba sponsor, maliyyə dəstəyi çox vacibdi. Heyət 20, 21, 22 yaşlı gənclərdən ibarətdir. Rəhbərlik tərəfindən qarşımıza əsas məqsəd kimi çempionatda qalmaq qoyulsa da, gənclərin potensialından maksimum yararlanıb yüksək yerlər uğrunda mübarizə aparacağıq. Üzərimizə düşən vəzifəni ən mükəmməl formada icra etməyə çalışacağıq”.