Ötən iki gündə bir neçə cütdə pley-offun ilk mərhələsinin qalibləri müəyyənləşdi.

"Football-plus.az" xəbər verir ki, “Çikaqo”nu 116:100 hesabıyla məğlub edən “Miluoki” seriyanı 4:1 öndə bitirdi. “Baks”ın növbəti mərhələdəki rəqibi “Bruklin”lə seriyadan qalib ayrılan (4:0) “Boston” olacaq.

“Denver”lə seriyanın 5-ci oyununda qalib gələn “Qolden Steyt”in növbəti mərhələdəki rəqibi bəlli deyil: “Memfis” - “Minnesota” seriyasında mübarizə davam edir.

“Filadelfiya” – “Toronto” cütündə qalib seriyanın 6-cı oyununda müəyyənləşdi. Seriyanı 4:2 öndə bitirən “Siksers” növbəti mərhələdə “Mayami” ilə qarşılaşacaq. Dünən “Finiks” “Nyu-Orlean”ı, “Dallas” “Yuta”nı mübarizədən kənarlaşdırdı. Beləliklə, “Finiks”lə “Dallas” daha bir cütü formalaşdırdı.

Yeri gəlmişkən, “Denver” üzərindəki son qələbə “Qolden Steyt”in baş məşqçisi Stiv Kerr üçün əlamətdar oldu. Məşqçi karyerasında pley-offda 81-ci qələbəsini qazanan Kerr bu göstəricidə Key Si Consla 9-cu yeri bölüşür. Pley-offda qələbə sayına görə rekordçu isə Fil Ceksondu (229).