“Zirə” sabah Konfrans Liqasının pley-offunun ilk matçında “Omoniya”nın qonağı olacaq.

“Football-plus.az” xəbər verir ki, Kirp yunanlarının baş məşqçisi Valdas Dabrauskas oyunöncəsi mətbuat konfransında iştirak edib.

- Bizi daha bir Avropa gecəsi gözləyir. Komandada həyəcan var. “Zirə” çox yaxşı oyunçulara malik, mütəşəkkil komandadı. Sabah stadionu dolduracaq azarkeşlərimiz kimi, biz də matçı səbirsizliklə gözləyirik və onları sevindirəcəyimizə ümid edirik.

– “Zirə”nin oyun tərzini təhlil etmisizmi?
- Rəqib ruhu olan komandadı. “Osiyek”lə iki oyununu izləmişik. Xüsusilə evdəki matçda üstün idilər. Qeyri-adi müdafiə üsulları var. Bu üzdən onlara qol vurmaq çətindi. Futbolçular arasında müəyyən işarələr sezmişik ki, bu da anlaşmalarını asanlaşdırır. Ümumiyyətlə, rəqiblə bağlı çox şeyi təhlil etmişik. Dörd gün ərzində çox çalışdıq. Mənə elə gəlir ki, oyuna hazırıq. Hədəf güclü tərəflərimizdən istifadə etməkdi. Rəqibi zəif nöqtələrindən “vurmağa” çalışacağıq.

– Premyer-liqa matçını niyə təxirə salmadız?
- Böyük komanda olmaq istəyiriksə, həftədə 2-3 oyunda mübarizə aparmağı bacarmalıyıq. Heyətimizin potensialını praktikada görmədən uğura inana bilmərik. İnkişaf etdiyimizi hər kəs görməlidi. Futbolçuların arxayın olmasını istəmirəm. Əsas heyətdə olmaq istəyirlərsə, çox çalışmalıdılar. Hələ başlanğıcdayıq. Mənim üçün avrokuboklar cəngəllikdi. Sağ qalmalıyıq. Həm də yayda yetərincə dincəlmişik. İndi istirahət etməyin vaxtı deyil.

– Roman Bezosun fiziki durumu necədi?
– Bu haqda dəqiq nəsə yoxdu. Zədəsi getdikcə yaxşılaşır. Həftəsonu həkimlər onun cavab matçında çıxış edib-edə bilməyəcəyi haqda qərarlarını verəcəklər.

- Sizcə, azarkeşlərin ümidlərini doğrulda biləcəksiz?
– Xalqımızdan dəstək istəyirik. Nəzərə almaq lazımdı ki, futbol gözlənilməz hadisələrin hər an baş verə biləcəyi idman növüdü. Bütün diqqətimizi meydanda yaşananlara yönəltməliyik. Tərəfdarlarımız Konfrans Liqasının qrup mərhələsinə keçəcəyimizə inanır. Amma bu inam ayaqlarımızı yerdən kəsməməlidi. Heyrətamiz dəstəyə görə onlara təşəkkür edirik.

KƏNAN BAHADIR