''Qalatasaray''dan ayrılaraq İngiltərəyə qayıtması gündəmdə olan Uilfrid Zahanın qarşısına yeni maneə çıxıb.

Baş məşqçi Okan Buruk ilk turdan sonra özü də etiraf etmişdi ki, Zaha İngiltərə klubları ilə danışıqlar aparır. Təcrübəli futbolçuya ən çox sabiq klubu ''Kristal Pelas'' ilə ''Lester'' maraq göstərir. Amma ilk iki turda adı iştirak ərizəsinə salınmayan kot d'İvuarlı vingerin satışı heç cür baş tutmur. ''Qalatasaray'' icarə haqqı kimi 9 milyon avro qazanacağı təqdirdə Zahanın 4,3 milyon avroluq illik maaşını ödəmək öhdəliyini üzərinə götürməyə razı idi. Limiti nəzərə alsaq, İstanbul nəhəngi bununla həm də heyətdə yeni əcnəbi üçün yer açmış olacaqdı. Amma vergi məsələsi bütün tərəflərin planlarını alt-üst edib.

Türkiyə mətbuatının yazdığına görə Zaha İngiltərəyə qayıdacağı təqdirdə ölkənin qaydalarına uyğun olaraq ötən mövsüm qazandığı məbləğin də vergisini ödəməli olacaq. 2023/24-ün gedişində bir neçə dəfə İngiltərəyə gedib qayıdan Zahanın 6 milyon avro vergi ödəməli olacağı üzə çıxıb. Ona görə də həm ''Kristal Pelas'', həm də ''Lester'' geri addım atmalı olub. Hər iki klub bu verginin ''Qalatasaray'' tərəfindən ödənilməsini istəyib. Türkiyə çempionu isə təbii ki, bu təklifi rədd edib. Ona görə də Zahanın İngiltərəyə qayıdışı vergi problemi həll olunana qədər belə desək, dondurulub.

ƏLİ