Nəhayət, David De Xea Avropada özünə yeni iş yeri tapıb.

“Football-plus.az” xəbər verir ki, “Mançester Yunayted”i bir il əvvəl azad agent kimi tərk edən qapıçı İtaliyada qərar tutub.
O, bundan sonra “Fiorentina”da çıxış edəcək. İtaliya klubunun mətbuat xidmətinin məlumatında keçidin detalları açıqlanmayıb. Yerli mənbələr isə ispaniyalı qolkiperlə “1+1 il” sxemi üzrə müqavilə imzalandığını xəbər verib.

Xatırladaq ki, De Xea 2023-cü ilin iyulunda ayrıldığı Mançester klubunda 12 il çıxış etmişdi. 33 yaşlı futbolçu son bir ildə əsasən Asiya klublarından cəlbedici təkliflər alsa da, yalnız Avropanın aparıcı liqalarında oynamaq istədiyini təkrarlamaqdan yorulmurdu.