"Sumqayıt" Misli premyer-liqasının 2-ci turunda "Turan Tovuz"un meydanından məğlub ayrıldı - 0:1.

"Football-plus.az" xəbər verir ki, "kimyaçılar"ın baş məşqçisi Samir Abasov matçdan sonra keçirilən mətbuat konfransında jurnalistlərin suallarını cavablandırıb.

- Xüsusilə, ikinci hissədə qol vurmaq üçün çox əziyyət çəkdik. Lakin alınmadı. Təəssüf ki, səfərdən xalsız qayıdırıq. Komanda şəklində deməzdim, amma bəzi futbolçular yaxşı oynadı. "Turan Tovuz"un ilk ev oyunu idi. Böyük ajiotajın yaşanmasına baxmayaraq, oyunçularım təsir altına düşmədi. Bu, məni çox sevindirir. Futbolçuların durumu qaneedicidi. Konfrans Liqasında mübarizəni dayandırdıqlarına görə çox üzgündülər. Tez-tez topu itirməklə yanaşı, bəzi ağlasığmaz səhvlər də etdilər. Elə səhvlər ki, komandanın oyununu sıradan çıxardı. Amma üstünlüyümüz də oldu. Digərləri səhvləri düzəltdi. Çempionat hələ yeni başlayıb. Yaxşı olacağına ümid edirik. Üzülmürük deməzdim, amma qısa vaxtda toparlanıb tam olaraq premyer-liqaya köklənəcəyik.

- Ehtiyat oyunçular skamyası hələ də kasaddı. Hücum cəhdlərində daha çox gücə ehtiyac olsa da, əlavə qüvvə yoxdu.
- Əvvəl demişəm, yenə təkrarlayıram. Bu barədə mənə sual verməyin. Bəli, bəzi epizodlarda heyəti gücləndirmək lazım idi. Olmadı. Transfer yoxdusa, bu heyətlə oynamalıyıq.

- Kurban Berdıyevin gəlişindən sonra "Turan Tovuz"da hansı dəyişiklikləri hiss etdiz?
- Çempionat hələ yeni başlayıb. İndidən dəyərləndirmək istəmirəm.

- Bilirik ki, hücumçunun işi qol vurmaqdı. Nikola Vuyneviç hələ dərk etmir ki, qol vurmağa gəlib?
- Məncə, yaxşı vəziyyətdədi. Sadəcə, hücum edərkən topu itirdiyimizdən komandada dağınıqlıq yaşanırdı. Həm azarkeş təzyiqinə tab gətirmək, həm də diqtə edən tərəf olmaq istəyirdik. Birinci hissədə müdafiəçilərimiz aktiv oynamasa da, ikincidə irəliləyiş hiss olundu.

- 54-cü dəqiqədə Rezabalaya qarşı kobud qayda pozuntusu qeydə alındı. Amma hakim qırmızı vərəqə göstərmədi. Bu barədə nə deyə bilərsiz?
- Çoxu həmin epizodda "qırmızı"nın olduğunu bildirdi. Nə deyək? Hakimin şəxsi qərarıdı. Deyəsən, tovuzlu azarkeşlərin yaratdığı atmosferə düşmüşdü. Bu üzdən ona iradımı bildirdim. VAR da müdaxilə etmədi.

- Rövlan Muradov kifayət qədər təcrübəli futbolçudu. Ötən mövsüm sabit çıxış edərək komandaya fayda verdi. Amma bu matçda belə olmadı. Onu əvəzləyərkən dərdinin nə olduğunu soruşdunuzmu?
- Yox, heç nə demədim. Dərdinin olduğuna inanmıram. Varsa, oyuna yansıtmamalıdı. Belə davam etsə, o yox, biz nəsə fikirləşməliyik.

- Konfrans Liqası və iki premyer-liqa oyunu geridə qaldı. Masaki Murata və Kasimir Ninqa kimi futbolçuları göndərmək üçün tələsdiyinizi düşünürsüz?
- Xeyr. Şəxsən, öz qərarım idi. İrəli getmək istəyiriksə, daha yaxşılarına ehtiyac var. Məncə, tamamilə düzgün addım atmışıq. Bu söhbət açılanda düşünürəm ki, kimsə nəsə başqa səbəb axtarır. İnanıram ki, onlardan yaxşılarını gətirəcəyik.

- İlk "dördlüy"ə yaxın pillələrdə qərarlaşmaq istəyirsiz. Transfer olmayacaqsa, bunu necə bacaracaqsız?
- Elə söz demədim. Yeni futbolçular almağa çalışacağıq. Sadəcə, alınmasa, əlimizdəki heyətlə hədəfə çatmalıyıq. Mənə elə gəlir ki, hər şey əladı. Möhkəm komandayıq.

- Adətən baş məşqçi istəyir, rəhbərlik də transfer edir. İndi durum necədi? Siz istəsəz də, rəhbərlik razı deyil?
- Bu suala cavab vermək istəmirəm.

- Niyə yaxşı şərait olsa belə, cinahlara asma edib qol vurmağa çalışmırsız?
- Futbolçularımın hamısı başla oynaya bilmir. Bəzi epizodlar üçün fərqli strategiyalar düşünmüşdük. Sadəcə, birinci hissə istədiyimiz kimi keçmədi. Asmanı qola çevirən futbolçu yoxdusa, asma etmək də mənasızdı.

KƏNAN BAHADIR