“Urs Şnayder ötən il birinci kateqoriyaya yüksəlib. Adətən, İsveçrədən yox, başqa ölkədən olan birinci kateqoriyali hakimə birdən-birə belə oyun verməzdilər. Sadəcə, İsveçrəni təmsil edir və bəllidi ki, UEFA orda yerləşir. Ümumilikdə çox zəif hakimlik etdi. Sifətində qorxaqlıq yazılmışdı, həyəcan var idi. Bütün bunları bir tərəfə qoymaq olar. Bəlkə həyəcanlıdı, çəkinir. Lakin verdiyi qərarlar çox vaxt birtərəfli, yəni "Ludoqorets"in xeyrinə olurdu. Çox zəif hakim idi, çox. 37-ci dəqiqədə rəqibin 9 nömrəli futbolçusu Kvadvo Dua birmənalı şəkildə meydandan qovulmalıydı. Halbuki ona "sarı" da göstərmədi. 88-ci dəqiqədə "qırmızı" alan Kayo Vidala hələ ilk yarıda iki sarı vərəqə verməliydi. "Ludoqorets" özünü çox həyasız aparırdı. Onların oyun üslubu elə idi. Yəni  "Qarabağ"ın hücumlarını ləngitmək, oyun tempini aşağı salmaq, yerdə yıxılıb uzun müddət qalmaq, hakimin göz yumduğu kobudluq və sair. "Qarabağ"a verilən hər iki sarı vərəqə düzgün idi. Amma ondan betər qayda pozuntuları vardı ki, "Ludoqorets"ə heç də göstərilmirdi. Yəni idarəçilik zəif idi. Aldığım dəqiq məlumata görə, oyunun niderlandlı hakim-inspektoru Marinus Koopman da onun idarəçiliyindən çox narazı qalıb. Şnayder bu səviyyəli oyunlara hələ hazır deyil".

“Hər iki komanda bizi təəccübləndirdi - biri yaxşı, digəri pis mənada. Çoxları "Osiyek" - "Zirə" oyununda üstünlüyü rəqibə verirdi. Əslində birinci hissədə hər şey buna uyğun gedirdi. Yəni "Zirə"də öz gücünə heç nə alındırmırdı. Hesab edirəm ki, Rəşad Sadıqovun Utziqlə Zeblini ehtiyatda saxlaması yanlış addım addım idi. Bəlkə də bilərəkdən ikinci hissəyə saxlamışdı. Ona görə də ilk yarıda komanda hücumda heç nə edə bilmədi. Fasilədən sonra isə Utziqin sayəsində işlər qaydasına düşdü. Bərabərlik gətirən penaltini də o qazandı. "Zirə" Xorvatiyadan sərfəli hesabla qayıtdı. Oyun göstərdi ki, "Osiyek"i keçmək mümkündü, amma "Şerif"lə matçdakı səhvlər təkrarlanmasa. Düşünürəm ki, məşqçilər korpusu həmin oyundan dərs çıxaracaq, bu oyuna ciddi yanaşacaq. Oyunun əvvəlində "Zirə"dən Hacıağa Hacılı ilə Ceyhun Nuriyev "sarı" aldı, hər iki qərar düzgün idi. Narazılıq etməyə əsas yoxdu. Əvvəla, ona görə ki, hakim Yunanıstandan idi. Erməni və ya yunan, fərqi yoxdu, hər şeyə hazır olmalıydıq. İkincisi, hakim qeyri-obyektiv olsa, "Zirə"nin penaltisindən öncə rəqibin cərimə zərbəsini verərdi. Bəli, penaltidə Utziqə qarşı qayda pozuntusu vardı, amma birinci bizimkilər qaydanı pozmuşdu. Yəni hakim “qartallar"a münasibətdə qərəzli olsaydı, heç o penaltini verməzdi. Normal idarəçilik saymaq olar. İkinci görüşə gəlincə, “Sabah" zəif oyunla hər birimizi təəccübləndirdi. Problemlər böyükdü, hətta deyərdim, Renduliçin problemləri var. Belə başa düşdüm ki, komandanı idarə edə bilmir. "Bayquşlar" çox zəif oynadı. "Sent Patriks" premyer-liqamızın ortabab klubu təsirini bağışladı. Buna baxmayaraq, bizə ən azı 3 top vura bilərdi. Sadəcə, ya qapıçı Yusif İmanov yaxşı oynadı, ya da rəqib oyunçuların ustalıq səviyyələri o qədər yüksək deyildi. "Makkabi"dən sonra başlayan problemlər bu oyunda da davam etdi. Əvvəl hücumda nəsə alınırdı, amma bu oyunda onu da görmədik. "Sabah"in oyunundakı "qırmızı"nı  hakim versəydi də, hakim-inspektor onu dəstəkləyəcəkdi, verməsəydi də. Lepinitsa cərimə meydançasının önündə perspektivli hücumun qarşısını aldı. Verməyə də bilərdi. Çünki hücumçunun qarşısında ən azı iki müdafiəçi vardı. Ümumilikdə idarəçilik normal idi. Hər iki matçda komandalarımıza münasibətdə ədalətli qərarlar verildi. Düşünürəm ki, "Sabah" da, "Zirə" də mərhələni keçəcək”.