Camal Musiala və Florian Virts Almaniya futbolunun yeni parlaq nümayəndələri sayılır.

Elə son Avropa çempionatında da bundestimdə bu futbolçular ön plana çıxdı. “Bavariya”lı Musialadan fərqli Virts top-komandada oynamır. Hər halda, “Bayer-04” ötən mövsümü Xabi Alonsonun başçılığı altında hər nə qədər mükəmməl keçirsə də, top-komanda sayılmır. Ona görə də Virts barədə şayiələr həmişə gündəmdədi. Bu futbolçu ötən mövsüm 49 rəsmi oyunda 18 qol, 20 məhsuldar ötürməlik əla performans sərgilədi. “Bayer-04”ün bundesliqanı və ölkə kubokunu qazanmasında, eləcə də Avropa Liqasının finalına yüksəlməsində onun böyük əməyi oldu. 21 yaşlı Virts bugünlərdə “Kikker”ə verdiyi müsahibədə geridə qalan AÇ-2024, hədəfləri və başqa məqamlar haqda danışıb.

- Almaniyanın AÇ-2024-də mübarizəni belə üzücü şəkildə bitirməsi hələ uzun müddət yaddaşlardan silinməyəcək...
- Bəli, bizim üçün sonluq çox üzücü oldu. Çünki İspaniya ilə oyunda artıq hər birimiz qalibin penalti seriyasında bəlli olacağını düşünürdük. Hətta ispanların qolundan öncə bəzi yaxşı fürsətlərimiz oldu. Bu cür şoku üzərimizdən atmaq üçün bizə bir neçə həftə lazım olacaq. Amma açıq danışsaq, İspaniya çempionluğa layiq idi. Biz isə özümüzlə və gördüyümüz işlə fəxr edə bilərik. Bütövlükdə turnir ərzində sərgilədyimiz oyun bizi həvəsdən düşməyə qoymur və gələcəyə pozitiv baxmağa vadar edir. Mən artıq psixoloji cəhətdən özümə gəlmişəm və yeni hədəflər uğrunda mübarizəyə hazıram.

- Sən şəxsən həmin məğlubiyyətdən hansı dərslər çıxardın?
- Bir neçə dəfə həmin oyunun geniş icmalını, əsas epizodlarını izləmişəm. Çünki harda səhvə yol verdiyimizi, nələri daha yaxşı edə biləcəyimizi görmək istədim. Həm də əlimizə düşən fürsətləri də bir daha görmüş oldum. Amma digər tərəfdən hər dəfə o oyunun icmalına baxanda heç də xoş hisslər keçirmirəm. Ona görə də artıq beynimi yormamağa söz vermişəm. Müəyyən dönəm keçəndən sonra diqqətimi başqa şeylərə yönəltməyə başladım. Sosial şəbəkələr? Orda elə də çox olmuram. Amma əlbəttə, öz qolumu izləmək mənə xoşdu.

- Sənin və Musialanın ətrafında çox böyük ajiotaj hökm sürürdü.
- Bəli, oyundan-oyuna hiss olunurdu ki, fanatların coşqusu artır. Azarkeşlərin səsi hər növbəti oyunda daha gur çıxırdı. Bundestim əvvəlki illərdə olduğu kimi, yenə insanlara sevinc bəxş etməyə başladı. Bunu görmək xoş oldu. Çünki bu, əsas hədəflərimizdən biri idi.

- Yeni mövsümdə karyeranda ilk dəfə Çempionlar Liqasında oynayacaqsan.
- Düzünü desəm, hələ ki bu haqda düşünmürəm. İndi məni maraqlandıran yeganə şey məşqlərdə üzərimdə durmadan çalışmaq və əvvəlki formamı mümkün qədər tez bərpa etməkdi. Amma ÇL, əlbəttə, təkrarolunmaz turnirdi və debütümü səbirsizliklə gözləyirəm. Nəhayət, meydanda bu turnirin himnini eşitmək mənə də qismət olacaq.

- Amma səninlə eyni yaşda olan Musialanın ÇL-də artıq kifayət qədər təcrübəsi var. O, bu turnirdə 4-5 mövsüm keçirib. Bu fakt səni narahat etmir?
- Mənim hədəfim sayılıb-seçilən futbolçulardan biri olmaqdı. Ona görə də bu turnirdə başqa futbolçularla rəqabət aparmaq maraqlı olacaq. Həmyaşıdlarım arasında yetərincə yaxşı oyunçular var. Amma onlara baxmamağa çalışıram. Mənim öz yolum var. Özümü sübut etmək və dünyanın ən güclü klub turnirində nəyə qadir olduğumu göstərmək istəyirəm. Böyük futbolçu olmaq istəyirsənsə, mütləq ÇL-də oynamalısan.

- Sənin gələcəyin və top-klublardan birinə transfer olunacağın barədə də çoxlu şayiə gəzir. Bu haqda nə deyə bilərsən?
- Transfer mövzusunda heç bir konkret planım, hədəfim yoxdu. Ona görə də sizə bu haqda heç nə deyə bilməyəcəm. Mövsümlərarası fasilə yavaş-yavaş başa çatır. Şadam ki, yenidən ən yüksək səviyyədə oynayaraq futboldan zövq ala biləcəm. Məni ilk növbədə komanda ilə qarşıya qoyulan hədəflər maraqlandırır. Həmin hədəflərə çatmaq üçün əlimdən gələni edəcəm. Bəlkə də yaxın gələcəkdə transfer mövzusunda bəzi şeylər konkretləşəcək. Amma indi dediyim kimi heç bir planım yoxdu.

- Necə düşünürsən, hansı oyun komponentlərində inkişafa ehtiyacın var?
- Hər oyun komponentində daha yaxşı ola bilərəm. Məsələn, istərdim ki, topla daha cəld olum. Və ya hava toplarında indikindən daha yaxşı oynayım. Bir çox başqa məqamlar da var. Bunları etdikcə komandama daha çox fayda verəcəm. Mən komandanın aparıcı üzvlərindən biriyəm. “Bayer-04”ün nəticələri baxımından mən də üzərimdə məsuliyyət hiss edirəm. Hədəfim “Bayer-04”ü daha da güclü etməkdi. Bunun üçün fiziki cəhətdən üzərimdə çox çalışmalı və ən əsası özümü zədələrdən qorumalıyam.

- Yeni mövsümdə bundesliqada çempionluq uğrunda hansı komandalar mübarizə aparacaq?
- “Bavariya” bu yay bir sıra transferlər edərək heyətini yetərincə gücləndirib. Amma məncə, “Bavariya” ilə bundesliqanın digər top-komandaları arasında səviyyə fərqi əvvəlki illərdəki qədər böyük deyil. Ona görə də biz heç kimdən çəkinmirik. Hərçənd çox özümüzdən razı da görünmək istəmirik. “Bavariya” elə “Bavariya”dı və həmişə bundesliqanın favoritidi. Biz onları yenməyə çalışacağıq. Onları hər zaman diqqətdə saxlamaq lazımdı. Ötən mövsüm “Leyptsiq”lə “Ştutqart” da baxımlı futbol sərgilədi. Dediyim kimi yuxarı pillələrdə səviyyə fərqi azalıb. Bu, bundesliqanın xeyrinə olan amildi.

- Conatan Ta ilə bağlı çətin durub yaranıb. O, “Bavariya”ya keçməyə can atır.
- Təbii ki, Ta yüksək səviyyəli müdafiəçidi və “Bayer-04”də qalsaydı, bizə böyük xeyri dəyə bilərdi. Çünki lider keyfiyətlərinə malikdi və arxa xətti çox yaxşı idarə edir. Ona görə də onun qalmasına yalnız şad olardım.

- Sənin kartof yeməkləri arasında sıralama müəyyənləşdirərkən sadə kartofu birinci yerə qoyduğun video Almaniyada qısa müddət hər kəsin dilinə düşdü və bununla bağlı çoxlu paylaşım edildi.
- Açığı, bu məsələ artıq əyləncəli olmaqdan çıxıb. Mən və ətrafımdakı insanlar bu adi videonun nə üçün bu qədər söz-söhbətə səbəb olduğunu anlamadıq. Bəlkə də bunu dilə gətirmək tərzim insanlara əyləncəli gəldi. Amma burda pis heç nə yoxdu. Hələ də fikrimdə qalıram və kartofu çox sevirəm. Amma eyni şeyi durmadan sağdan-soldan mənə bağıranda artıq özümü görməməzliyə və eşitməməzliyə vururan. Belə şeylər müəyyən andan sonra artıq gülməli olmur.

ƏLİ RAUFOĞLU hazırladı