Ukrayna çempionatının yekunlarından bəhs edən yazıda “Dnepr-1”in elitadan kənarlaşdırılması nəticəsində maraqlı vəziyyət yarandığını xəbər vermişdik.

“Minay”, “Metallist 1925”, “Episentr” və “Levıy Bereq” arasında keçirilən mini-turnirin finalı iyulun 30-da baş tutdu. “Minay”ı darmadağın edən (3:0) “Levıy bereq” tarixində ilk dəfə elitada oynamaq imkanı qazandı. Yeni mövsüm isə avqustun 3-də start götürdü...

Çempion “Şaxtyor” debüt oyununa Poltavada çıxdı. “Vorskla” tarixən “şaxtaçılar” üçün çətin rəqib sayılır. Poltavadakı stadionun qazonu hər nə qədər bərbad vəziyyətdə olsa da, qonaqlar inamlı qələbə qazandı. Hesabı 8-ci dəqiqədə uzaq məsafədən gözəl zərbə ilə Matviyenko açdı, yarım saatını tamamında Zubkov fərqi artırdı. 66-cı dəqiqədə qalibin kimliyinə şübhə yeri qalmadı. Eginaldoya qarşı kobudluğa görə təyin olunan penaltini Sudakov qola çevirdi. Sonda daha iki dəfə fərqlənən “Şaxtyor” avrokubok həftəsinə xoş əhval-ruhiyyədə qədəm qoyur.

Yeni mövsüm Rovnoda keçirilən “Veres” – “Karpatı” oyunu ilə start götürdü. Meydan sahiblərinin fərqlənmək üçün bir neçə imkanı olsa da, hesab açılmadı.

Ötən mövsümün bürünc müdalçısı “Krivbass” evdə “Çernomorets”i məğlub etdi. Tverdoxlebin oyunun əvvəlində vurduğu qola “dənizçilər” cavab verə bilmədi. Turun qalan oyunlarına gəlincə, debütant “Levıy Bereq” LNZ ilə qarşılaşmada xal qazanmağa çox yaxın idi. Ancaq kiyevlilərin müdafiə xəttinin 90+3-cü dəqiqədə buraxdığı səhvdən Assinor yararlandı. Daha bir debütant “İnqulets” “Zarya” ilə səfər oyununda xoş təsir bağışlasa da, məğlubiyyətdən qurtula bilmədi. Bu oyunda da sonuncu qol uzatma dəqiqələrində vuruldu. “Obolon” – “Kolos” qarşılaşması məhsuldar heç-heçə ilə bitdi.

1-ci tur
Vorskla – Şaxtyor 0:5
Matviyenko, 8; 68. Zubkov, 31. Sudakov, 66-p. Sikan, 88.
Şaxtyor: Riznık, Bondar, Matviyenko, Pedro Enrike, Konoplya, Bondarenko (Stepanenko, 73), Sudakov, Kevin (Sikan, 73), Marlon Qomes (Eginaldo, 64), Zubkov (Pedrinyo, 73), Traore (Krıskiv).

Krivbass – Çernomorets 1:0
Tverdoxleb, 6.
Krivbass: Klişuk, Stetskov, Kuzık (Sosa, 68), Bandeyra, Dibanqo, Xomçenovski (Mikitişin, 46), Tverdoxleb, Vakulko (Bizimana, 84), Romançuk, Lunyov (Po, 68), Prins (Kojuşko, 74).

Veres – Karpatı 0:0
LNZ – Levıy Bereq 1:0
Assinor, 90+3.

Obolon – Kolos 2:2
Çernenko, 59. Slobodyan, 67 – Surikov, 48; 87.

Zarya – İnqulets 2:1
Başiç, 16. Yatsık, 90+2 – Belotserkoveç, 29.

“Aleksandriya” – “Dinamo”, “Rux” – “Polesye” oyunları təxirə salınıb.
Bombardirlər: Matviyenko (Şaxtyor), Surikov (Kolos) – 2.

Növbəti turun oyunları avqustun 9-12-si aralığında keçiriləcək: Levıy Bereq – Vorskla, Veres – Dinamo, Çernomorets – Zarya, Kolos – İnqulets, Obolon – Rux, Karpatı – Krivbass, Şaxtyor – Polesye, LNZ – Aleksandriya.