Son günlərdə “Barselona” ətrafında yenə maraqlı xəbərlər dolaşır. Yeni baş məşqçi Hans-Diter Flik rəsmi şəkildə təqdim olunub, klub rəhbərliyi Lamin Yamalı PSJ-nin təklif etdiyi 250 milyon avro müqabilində satmaqdan imtina edib, həminin “göy-narıncılar”ın sonuncu Avropa çempionatında xarüqələr yaradan Dani Olmo ilə Niko Uilyamsı almağa cəhd etməsi ilə bağlı şayiələr dolaşır.

Hələ ki indiki “transfer pəncərəsi” kataloniyalılar üçün uğurlu deyil. Klub prezidenti Xuan Laporta daimi axtarışdadı, ağır maliyyə durumunda vəsait tapmağa çalışır, ancaq heç nə alınmır. Klubun azarkeşləri də dərin məyusluq içindədi. Onlar anlayırlar ki, Kilian Mbappeni də “rənglərinə bağlayan” “Real”la ayaqlaşmaq çətin olacaq. Bəs “Barsa” maliyyə baxımından niyə belə əziyyət çəkir?

Hər şe6 2015-ci ildə Çempionlar Liqasını qazanandan sonra başladı. Məhz onda klubun əməkhaqqı cədvəli kəskin şəkildə “şişdi”. Ardından pandemiya və vəziyyəti başlı-başına buraxan əvvəlki rəhbərliyin bacarıqsızlığı üzündən əlavə çətinliklər yarandı. “Kamp Nou”nun yenidən qurulması xərcləri artıran daha bir əməl oldu, halbuki mövcud problemlə fonunda bunu təxirə salmaq olardı.

Nəticədə “Barsa” kredit girdabına düşdü. 2021-ci ilin yazında klub rəhbərliyinə dönən Laportaya böyük borc məbləği miras qalmışdı. Xuan əvvəlcə “Goldman Sachs”dan 600 milyon avro kredit götürdü ki, vəziyyəti müəyyən qədər düzəltsin. Daha sonra teleyayın hüququ üzrə səhmlərin 25, “Barca Studios”un səhmlərinin 49 faizini satmaq lazım gəldi. Ancaq əldə olunan vəsait borcların azaldılmasına yox, müqavilələrin yenilənməsinə və yeni, baha oyunçuların transferinə sərf olundu.

“Barselona” təcili “1-in 1-ə” qaydasına dönməlidi, yəni yalnız qazandığı hər avronu xərcləməlidi. İndi klub “1-in 4-ə” qaydası ilə yaşayır, yəni hər avrodan yalnız 25 sent xərcləyə bilər. Belə keçidi təmin etmək üçün kluba böyük həcmdə vəsait cəlb olunmalıdı.

Bundan sonra necə olacaq?
“Barselona” hazırda geyim təchizatçısı kimi “Nike” şirkəti ilə əməkdaşlıq edir, ancaq münasibətlər gərgindi. Laporta müqaviləni pozmaq və öz istehsalına başlamaq təhdidi ilə sponsorluq məbləğini artırmağa çalışdı. Danışıqlar hələ da davam edir. Apreldən bəri xəbərlər gəzir ki, klubla Amerika şirkəti arasında 100 milyon avroluq, 10 illik yeni müqavilə imzalanacaq, ancaq hələ də müvafiq elan yoxdu. Şayiələrə inansaq, Laporta 100 milyon avronu dərhal almaq istəyir ki, maliyyə yırtığını yamasın, ancaq “Nike” belə formatın məqsədəuyğunluğuna hələ şübhə edir.

“Barca Studios” məsələsi də aktual problem kimi qalır. Onun səhmlərinin 30 faizi kluba məxsus olan “Руреса Orpheus” prodüser şirkətini alan “Libero”ya məxsusdu. Ancaq “Libero” ilkin ödəniş kimi nəzərdə tutulan 40 milyon avronu ödəməyib.
Belə vəziyyətdə komandanın liderlərindən Robert Levandovskinin, Lük de Yonqun gedişi və ya satılması (“Barsa” vergiləri də nəzərə alsaq, onlara ildə uyğun olaraq, 66 və 75 milyon avro əməkhaqqı ödəyir) çıxış yolu ola bilərdi. Ancaq klub onlarla bağlı heç bir təklif almayıb. Rafinya Səudiyyə Ərəbistanına yollanmaqdan boyun qaçırır, Arauxonun “Bavariya”ya mümkün transferi uruqvaylının zədəsi üzündən baş tutmadı, Yamalı heç bir şərt daxilində satmaq istəmirlər. Bir sözlə, satışla bağlı məsələlər dalana dirənib.

Bütün bunlar klubun növbəti mövsümlə bağlı maliyyə proqnozlarını arzuolunmaz hala gətirib. “Göy-qırmızılar” futbolçularına müştəri tapmasa, büdcədə ciddi kəsir yaranacaq. Bununla belə, Laporta nikbin əhval-ruhiyyədədi. Onun dediyinə görə, “Barsa” nəhəng transferlər həyata keçirə bilər:

İspanlara bel bağlamaq
Kataloniyalılar bu yay hələ ki yalnız bir transfer gerçəkləşdirib – “Jirona”dan Pau Viktoru 2,7 milyon avroya alıblar. Bu hücumçu ötən mövsümü “Barselona B”də keçirib, odu ki, onun komandanı ciddi şəkildə gücləndirəcəyini demək çətindi. Amma indi “Barsa”nın əsas transfer hədəfi Niko Uilyamsdı. Ardıcıl bir neçə gün ərzində Flikin komandasının vingeri “rənglərinə bağlayacağı” ilə bağlı söz-söhbət gəzdi, ancaq son məqamda PSJ də dövrəyə girdi. “Mundo Deportivo”nun yazdığına görə, parislilər ispan futbolçunu ələ keçirmək üçün Kataloniya klubundan iki dəfə artıq məbləğ təklif etməyə hazırdı. Transfer təhlükə altındadı, azarkeşlərin sosial şəbəkələr vasitəsi ilə etdiyi ianələr də işə yaramaya bilər.

“Barselona” Dani Olmo ilə də fəal şəkildə maraqlanır. “Leyptsiq” artıq kataloniyalıların 40 milyon avro nəqd + bonuslar şəklində 20 milyon təklifini geri çevirib. Bundan başqa, “blauqrana”nın Avropa çempionunu heyətində görmək istəyən “Bavariya” və “Mançester Siti” kimi ciddi rəqibləri də var. “Transfer pəncərəsi”nin sonuna (İspaniyada avqustun 30-da bağlanır) hələ çox qalsa da, gündən-günə “Barsa”nın perspektivləri daha qaranlıq görünür.

Mbappenin “Real”a keçidindən sonra çoxları La Liqada çempionluq intriqasının öldüyünü düşünür. İndiki “Barselona” heyətində onun, Bellingemin, Vinisiusun, Rodriqonun və başqa ulduzların olduğu əzəli rəqibi necə dayandıra bilər? Kataloniya klubu güclənməsə, yeni mövsümdə hansısa çempionluq mübarizəsi gözləməyə dəyməz.

"Football-plus.az"