“Barselona”da yenə sakitlik pozulub.

“Football-plus.az” xəbər verir ki, klub prezidenti Xuan Laporta “Real”ın klub televiziyasına hücum çəkərək madridliləri onun vasitəsi ilə hakimlərə təzyiq göstərməkdə suçlayıb, həmçinin kataloniyalılarla hazırda müqaviləsi olan geyim təchizatçısı “Nike” şirkətini tənqid edib. Çox güman, ən yaxın günlərdə tərəflər əməkdaşlığı bitirəcək.

Klubun “Nike” ilə bağlı iradları var
“Barselona” ilə Amerika şirkəti arasındakı ilk müqavilə uzaq 1998-ci ilə imzalanıb və indiyə qədər bir neçə dəfə yenilənib. Hazırkı müqavilənin müddəti 2028-ci ilə qədərdi. Ancaq kataloniyalılar artıq yeni forma istehsalçısı axtarır. Bu mövzuda ilk xəbərlər ötən ilin dekabrında ictimailəşib: onda “Diario Sport” iddia edirdi ki, klub rəhbərliyi Amerika şirkətinin ödənişlərindən narazıdı. Müqavilə üzrə “Barselona”ya hər il 105 milyon və əlavə bonus kimi 50 milyon avro ödənilməlidi. Rəqəmlər doğrudusa, onda klub forma istehsalçısı ilə sponsorluq müqaviləsi baxımından dünyadakı ən dəyərli sövdələşmələrdən birinin içindədi. “Football Benchmark”ın məlumatına görə, yalnız “Mançester Yunayted” (ildə 106 milyon avro) və “Real” (120 milyon) daha baha müqaviləyə malikdi.

Klubların geyim şirkətləri ilə imzaladığı nəhəng sponsorluq müqavilələri
klub şirkət illik məbləğ (milyon avro ilə) müqavilə müddəti
Real Adidas 120 2020-28
Mançester Y. Adidas 106 2025-35
Barselona Nike 105 2018-28
Arsenal Adidas 87,9 2024-30
PSJ Nike 80 2019-32
Mançester Siti Puma 76,2 2019-29
Çelsi Nike 70,4 2017-32
Bavariya Adidas 60 2015-30
Yuventus Adidas 55,1 2019-27
Liverpul Nike 35,2 2020-25

Ancaq Laporta belə hesab edir ki, Kataloniya klubu daha artığına layiqdi: “İndi əlimizdə olan müqavilə bazarın ən yaxşısı deyil, ancaq “Barsa” dünyada ən çox futbolkası satılan klubdu. Bazardakı ən yaxşı müqavilə bizdə olmalıdı, belə deyilsə, onda xoşbəxtlikdən başqa variantlarımız da var”.

Nə qədər təəccüblü olsa da, Laporta haqlıdı. UEFA-nın fevralda açıqladığı maliyyə hesabatına inansaq, “Barselona” klub merçendayzinqinin satışından hamıdan çox – 170 milyon avro qazanıb. Kataloniyalıların ən yaxın izləyicisi “Real”ın gəliri 155 milyon avro təşkil edib. Klubdakı anonim mənbə “The Athletic”ə bildirib ki, “Barsa”nın çoxdan “Nike” şirkətinin işi ilə bağlı iradları var. Klubun fikrincə, Amerika şirkəti heç də bütün müqavilə tələblərini yerinə yetirmir, keyfiyyəti aşağı düşən atributların çatdırılmasını da yubadır. Elə fanatlar da narazıdı: Amerika şirkətinin kreativliyi aşağı düşüb, bəzi forma dəstləri keyfiyyətinə (bəzi futbolkalar yuyulan kimi sıradan çıxıb) və xarici görünüşünə (məsələn, 2020/21 mövsümü üçün hazırlanan qızılgül rəngində olan forma) görə tənqid olunur.

Laporta özü də müqavilə tələblərinin yerinə yetirilmədiyini ictimaiyyətə deyib. İndi isə o, müqaviləni pozmaq istəyir: “Nike” şirkətinə demişik ki, müqavilə kobudcasına pozulduğuna görə onu dayandırmaq istəyirik. Bizə kompensasiya ödəmək üçün 45 gün vaxtları var idi, ancaq ödəmədilər”.

“Nike”ın yerini kim tutacaq?
Aydındı ki, müqaviləni pozmaq üçün əsas axtaran Laporta onu tapıb. Klub son bir neçə ayda yeni tərəfdaş axtarışı ilə məşğuldu. Favoritlər sırasında “Puma”, “New Balance” və “Hummel” göstərilir. Klub rəhbərliyi ən sərfəli təklifi gözləyir. Hərçənd klub daxilindəki mənbələr onlardan hansınınsa “Nike” ilə müqayisədə ikiqat artıq məbləğ təklif edə biləcəyinə şübhə edir. “Marca”nın yazdığına görə, “Puma” kataloniyalılara 100 milyon avroluq imza bonusu və illik 120 milyon ödəniş təklif edir.

Kənar şirkətlər klubun tələblərini yerinə yetirə bilməsə, “Barsa” daxili ehtiyatları işə salacaq. Söhbət klub merçendayzinqinə görə cavabdehlik daşıyan BLM şöbəsindən gedir. Ötən il kataloniyalıların büdcəsinə 100 milyon avro əlavə edən BLM klubun gəlirlərini formalaşdırmaqda 4-cü yerdədi. Yəni kataloniyalılar özləri öz formalarını istehsal edə bilər. Ancaq Laporta belə hesab edir ki, təcrübəli geyim təchizatçısının cəlb olunması “Barsa” üçün daha sərfəli və təhlükəsizdi.

Laporta “Nike” şirkətini təzyiq altında əzdiyinə və yaxın günlərdə müqaviləni pozacağına əmindi. “Nike” isə öz növbəsində susqunluğu qoruyur, heç bir rəsmi açıqlama vermir. Belə bir variant da mümkündü ki, “Barselona” 125 illiyini qeyd edəcəyi növbəti mövsümdə özünün istehsalı olan forma ilə oynasın (bu forma azarkeşlər və kolleksiya yığanlar arasında böyük maraq doğuracaq), 2025/26 mövsümünə isə yeni geyim təchizatçısı ilə başlasın.